ជីវិតកម្មករឥណ្ឌា ៤០នាក់ ដែលជាប់ក្នុងផ្លូវក្រោមដីអស់រយៈពេលជាង ៧២ម៉ោង ស្ថិតក្នុងភាពមិនច្បាស់លាស់នៅឡើយ ខណៈអាជ្ញាធរព្យាយាមជួយសង្គ្រោះពួកគេ។ កម្មករកំពុងសាងសង់ផ្លូវរូងក្រោមដីនៅភាគខាងជើងរដ្ឋ Uttarakhand នៅពេលនោះផ្នែកមួយនៃផ្លូវរូងបានបាក់ស្រុតដោយសារតែបំណាក់ដី កាលពីថ្ងៃអាទិត្យ។ ក្រុមជួយសង្គ្រោះរដ្ឋ និងសហព័ន្ធ បាននឹងកំពុងប្រើប្រាស់ការខួងដីទ្រង់ទ្រាយធំ រុញកម្ទេចកម្ទី ដើម្បីបានទៅដល់កម្មករទាំងនោះ។ ក្រុមមន្ត្រី អាចបង្កើតទំនាក់ទំនងជាមួយកម្មករ។ នៅពេលនេះ អាជ្ញាធរកំពុងនាំយកឧបករណ៍ខួងទំនើបបន្ថែមទៀតពីទីក្រុងញ៉ូវដេលី ដើម្បីពន្លឿនប្រតិបត្តិការជួយសង្គ្រោះ។

ក្រុមមន្ត្រីបាននិយាយថា កម្មករបានជាប់នៅក្នុងផ្លូវរូងក្រោមដីចម្ងាយប្រហែល ២០០ម៉ែត្រ ហើយគ្មាននរណាម្នាក់ក្នុងចំណោមពួកគេរងរបួសនោះទេ។ ក្រុមអ្នកជួយសង្គ្រោះ បានផ្តល់អាហារ ទឹក និងអុកស៊ីសែនដល់អ្នកទាំងនោះ តាមរយៈបំពង់សម្រាប់រយៈពេល ៧២ ម៉ោងចុងក្រោយនេះ។

ប៉ុន្តែគេនៅមិនទាន់ដឹងច្បាស់នោះទេថា តើវាត្រូវចំណាយពេលយូរប៉ុណ្ណាទៀតទើបអាចនាំពួកគេចេញផុតពីគ្រោះថ្នាក់។ លោក Karam Veer Singh នៅក្នុងក្រុមដឹកនាំកិច្ចខិតខំប្រឹងប្រែងសង្គ្រោះ បាននិយាយថា ប្រតិបត្តិការជួយសង្គ្រោះកំពុងបន្តទាំងយប់ទាំងថ្ងៃ។

លោក Ashok Kumar អគ្គនាយកនគរបាល រដ្ឋUttarakhand បាននិយាយថា ល្បឿននៃការខួងដីត្រូវបានបន្ថយ ដោយសារតែឧបសគ្គធម្មជាតិ ដែលធ្វើឱ្យមានការលំបាកសម្រាប់អ្នកជួយសង្គ្រោះក្នុងការទៅដល់កម្មករ។ លោកបាននិយាយថា យើងមានទំនុកចិត្តថា យើងនឹងជួយសង្គ្រោះកម្មករទាំងនោះបាន ប៉ុន្តែទម្រាំដល់ពេលនោះ យើងត្រូវតែអត់ធ្មត់ និងមានជំនឿ។