សភាដាណឺម៉ាក កាលពីថ្ងៃអង្គារ (ទី១៤ ខែវិច្ឆិកា) បានចាប់ផ្តើមពិភាក្សាដេញដោលលើកដំបូង ក្នុងចំណោមការដេញដោលគ្នាចំនួន ៣លើក ជុំវិញសេចក្ដីស្នើច្បាប់ ដែលនឹងហាមប្រាមមិនឲ្យដុតគម្ពីរកូរ៉ាន។

កាលពីខែសីហា រដ្ឋាភិបាលដាណឺម៉ាក បានប្រាប់ថា ខ្លួនកំពុងស្នើច្បាប់ ដែលនឹងដាក់ទោសដល់អ្នក ដែលដុតច្បាប់ចម្លងនៃគម្ពីរកូរ៉ាន និងអត្ថបទសាសនាផ្សេងទៀត នៅកន្លែងសាធារណៈ។

គួរបញ្ជាក់ដែរថា កាលពីរដូវក្តៅ ប្រទេសដាណឺម៉ាក និងស៊ុយអែត បានកើតមាននូវការតវ៉ាជាសាធារណៈបន្តបន្ទាប់ ដែលនៅកន្លែងតវ៉ានោះ ច្បាប់ចម្លងនៃគម្ពីរកូរ៉ានត្រូវបានដុត ឬបើមិនដូច្នេះទេ ត្រូវបានបំផ្លាញ ដោយទង្វើនោះ បានបណ្តាលឲ្យផ្ទុះកំហឹងនៅក្នុងចំណោមប្រទេសមូស្លីម ដែលបានទាមទារឲ្យរដ្ឋាភិបាលនៃប្រទេសអាត្លង់ទិកខាងជើង បញ្ឈប់ការដុតនោះ។

ជាមួយគ្នានេះ រដ្ឋាភិបាលបានច្រានចោលការតវ៉ារបស់គណបក្សប្រឆាំងដាណឺម៉ាកមួយចំនួន ដែលបាននិយាយថា ការហាមឃាត់មិនឲ្យដុតគម្ពីរកូរ៉ាន នឹងរំលោភលើសេរីភាពការបញ្ចេញមតិ។ ការពិនិត្យពិចារណាលើសេចក្តីព្រាងច្បាប់នេះ នឹងធ្វើឡើងចំនួន ៣ដង មុនពេលរដ្ឋសភានឹងបោះឆ្នោតសម្រេច៕