ប្រភពសន្តិសុខចំនួន ២របស់អេហ្ស៊ីប បានឲ្យដឹងថា រថយន្តដំបូងចែកចាយប្រេងឥន្ធនៈដល់តំបន់ហ្គាហ្សាស្រ្ទីប ចាប់តាំងពីអ៊ីស្រាអែលឡោមព័ទ្ធទាំងស្រុងតំបន់បិទច្រកមួយនេះ នៅក្នុងសង្រ្គាមរបស់ពួកគេ ជាមួយក្រុមហាម៉ាស់ បានចាប់ផ្តើមឆ្លងកាត់ព្រំដែននៅថ្ងៃពុធនេះ ចេញពីប្រទេសអេហ្ស៊ីប ។

យោងតាមប្រភពព័ត៌មានមនុស្សធម៌ បានឲ្យដឹងថា ការចែកចាយប្រេងឥន្ធនៈនេះ ត្រូវបានផ្តល់ជូនដោយអ៊ីស្រាអែល សម្រាប់ប្រេងម៉ាស៊ូត ២៤.០០០លីត្រ ដើម្បីអនុញ្ញាតឲ្យចូលតំបន់ហ្គាហ្សា សម្រាប់ប្រើប្រាស់របស់រថយន្តចែកចាយជំនួយអង្គការសហប្រជាជាតិ(UN) តែមិនមែនសម្រាប់ប្រើប្រាស់នៅក្នុងមន្ទីរពេទ្យនោះទេ ។

ការចែកចាយជំនួយមនុស្សធម៌មានដែនកំណត់ បានឆ្លងកាត់ព្រំដែនចេញពីប្រទេសអេហ្ស៊ីបចូលទៅកាន់តំបន់ហ្គាហ្សា ចាប់តាំងពីថ្ងៃទី ២១ ខែតុលារហូតមក ប៉ុន្តែអ៊ីស្រាអែល បដិសេធន៍មិនអនុញ្ញាតឲ្យចែកចាយប្រេងឥន្ធនៈទៅកាន់តំបន់ហ្គាហ្សានោះទេ ដោយសារក្រុមហាម៉ាស់មានស្តុកច្រើន ។

UNបានព្រមានរយៈពេលប៉ុន្មានថ្ងៃចុងក្រោយនេះថា ក្នុងពេលដ៏ខ្លីខាងមុខនេះពួកគេត្រូវតែបញ្ឈប់ប្រតិបត្តិការមនុស្សធម៌ រួមទាំងការចែកចាយជំនួយទៅកាន់តំបន់ហ្គាហ្សា ពេលដែលស្តុកប្រេងឥន្ធនៈពួកគេ បានអស់ទាំងស្រុង ។

 ក្រុមការងារជំនួយនិយាយថា កង្វះខាតប្រេង ដែលត្រូវការសម្រាប់ម៉ាស៊ីនភ្លើងមន្ទីរពេទ្យ និងការផ្តល់ទឹក ក៏ដូចជាការចែកជំនួយនោះ រួមចំណែកធ្វើឲ្យកើតមានស្ថានភាពដ៏អាក្រក់បំផុតសម្រាប់ជនប៉ាឡេស្ទីន ២,៣លាននាក់នៅក្នុងតំបន់ហ្គាហ្សា ។

 ការចែកចាយដំបូងប្រេងម៉ាស៊ូត ២៤.០០០លីត្រនេះ មានបំណងប្រើប្រាស់រយៈពេល ២ថ្ងៃ ក្នុងនោះប្រេង ១២.០០០លីត្រ សម្រាប់ប្រើប្រាស់រយៈពេល ១ថ្ងៃ ។

 ក្រុមសាក្សី និយាយថា រថយន្ត ២គ្រឿងផ្សេងទៀត បានចតនៅខាងអេហ្ស៊ីប ត្រង់ចំណុចច្រកព្រំដែន Rafah រង់ចាំធ្វើដំណើរចូលទៅកាន់តំបន់ហ្គាហ្សា ប៉ុន្តែគេនៅមិនទាន់ដឹងច្បាស់នោះទេថាតើពេលណារថយន្តទាំង ២គ្រឿងនេះ នឹងបើកចូល ៕