ប្រធានាធិបតីទួរគីលោក Recep Tayyip Erdogan នៅថ្ងៃពុធ (ទី១៥ ខែវិច្ឆិកា) នេះ បានលើកឡើងថា អ៊ីស្រាអែល គឺជា «រដ្ឋភេរវកម្ម» ដែលប្រព្រឹត្តឧក្រិដ្ឋកម្មសង្គ្រាម និងបំពានច្បាប់អន្តរជាតិ នៅតំបន់ហ្កាហ្សា ខណៈពេលដែលរូបលោកកំពុងនិយាយឡើងវិញនូវទស្សនៈរបស់លោកថា ក្រុមហាម៉ាសមិនមែនជាអង្គការភេរវករនោះទេ។

អំឡុងពេលថ្លែងទៅកាន់សមាជិកសភា នៅរដ្ឋសភា លោក Erdogan ក៏បានអំពាវនាវឲ្យនាយករដ្ឋមន្ត្រីអ៊ីស្រាអែល លោក Benjamin Netanyahu ប្រកាសថា តើអ៊ីស្រាអែលមានគ្រាប់បែកនុយក្លេអ៊ែរ ឬអត់ ហើយថែមទាំងបានបន្ថែមថា នាយករដ្ឋមន្ត្រីអ៊ីស្រាអែល គឺ «បរាជ័យ» ក្នុងមុខតំណែងរបស់គាត់។ លោកបានប្រាប់ថា ក្រុមហាម៉ាស គឺជាគណបក្សនយោបាយមួយ ដែលត្រូវបានបោះឆ្នោតជ្រើសរើសដោយប្រជាជនប៉ាឡេស្ទីន។

ការអត្ថាធិប្បាយរបស់លោក Erdogan គឺជាការបន្ទឡើងវិញនូវសេចក្តីថ្លែងការណ៍ស្រដៀងគ្នានៅមុននេះ ដែលលោកបានធ្វើ ចាប់តាំងពីមានការសម្លាប់រង្គាល កាលពីថ្ងៃទី៧ ខែតុលា។ មេដឹកនាំទួរគីរូបនេះ បានហៅអ៊ីស្រាអែលម្តងហើយម្តងទៀតថា ជា «អ្នកកាន់កាប់» ដោយទទូចថា រដ្ឋជ្វីហ្វត្រូវបានវាយប្រហារដោយ «អ្នកប្រយុទ្ធទាមទារសេរីភាព»ប៉ាឡេស្ទីន។

នៅដើមខែវិច្ឆិកានេះ ប្រទេសទួរគីបានកោះហៅឯកអគ្គរដ្ឋទូតរបស់ខ្លួនប្រចាំនៅអ៊ីស្រាអែល លោក Sakir Ozkan Torunlar ដើម្បីមក«ពិគ្រោះយោបល់» ដោយសារតែប្រតិបត្តិការរបស់អ៊ីស្រាអែល នៅតំបន់ហ្កាហ្សា៕