ប្រធានាធិបតីទួរគី លោក Tayyip Erdogan បាននិយាយកាលពីថ្ងៃពុធ (១៥ វិច្ឆិកា) ថា អ៊ីស្រាអែល គឺជា «រដ្ឋភេរវកម្ម» ដែលប្រព្រឹត្តឧក្រិដ្ឋកម្មសង្គ្រាម និងបំពានច្បាប់អន្តរជាតិ​នៅក្នុងតំបន់ហ្កាហ្សា ដោយលោកបានធ្វើការរិះគន់ម្តងហើយម្តងទៀត ចំពោះបណ្ដា​មេដឹកនាំ​អ៊ីស្រាអែល និងអ្នកគាំទ្ររបស់ពួកគេនៅលោកខាងលិច។

ថ្លែងរយៈពេលពីរថ្ងៃមុនដំណើរទស្សនកិច្ចដែលបានគ្រោងទុកទៅកាន់ប្រទេសអាល្លឺម៉ង់ ដើម្បី​ជួបលោ​កអធិការបតី Olaf Scholz លោក Erdogan បាននិយាយថា យុទ្ធនាការយោធា​របស់​អ៊ីស្រាអែល ប្រឆាំងនឹងក្រុមសកម្មប្រយុទ្ធប៉ាឡេស្ទីន ហាម៉ាស រួមមាន «ការវាយប្រហារ​ដ៏ក្បត់​ជាតិ​បំផុតក្នុងប្រវត្តិសាស្ត្រមនុស្សជាតិ» ជាមួយនឹងការគាំទ្រ «គ្មានដែនកំណត់» ពីលោក​ខាងលិច។

លោកបានអំពាវនាវឱ្យបណ្ដាមេដឹកនាំអ៊ីស្រាអែល ត្រូវបានកាត់ទោស​ពីបទឧក្រិដ្ឋកម្ម​សង្រ្គាម​នៅតុលាការ​យុត្តិធម៌អន្តរជាតិនៅទីក្រុងឡាអេ ហើយបានលើកឡើងម្តងទៀត​នូវទស្សនៈ​របស់​លោក និងជំហររបស់ប្រទេសទួរគី ថាក្រុមហាម៉ាស មិនមែនជាអង្គការភេរវករទេ ប៉ុន្តែជា​គណបក្ស​នយោបាយដែលបានឈ្នះការបោះឆ្នោតកន្លងមក។

អង់គ្លេស សហរដ្ឋអាមេរិក សហភាពអឺរ៉ុប និងបណ្ដារដ្ឋអារ៉ាប់មួយចំនួនបានចាត់​ទុក​ក្រុមហាម៉ាស ថាជាក្រុមភេរវករ មិនដូចប្រទេសទួរគីឡើយ។ ទីក្រុងអង់ការ៉ា បានធ្វើជាម្ចាស់​ផ្ទះ​ទទួល​សមាជិកក្រុមហាម៉ាស មួយចំនួន និងគាំទ្រសេចក្ដីសម្រេចរដ្ឋពីរចំពោះជម្លោះអ៊ីស្រាអែល និងប៉ាឡេស្ទីន៕