ក្រុមបាតុករបានដើរដង្ហែក្បួននៅតាមដងផ្លូវនៃទីក្រុង សាន់ហ្រ្វាន់ស៊ីស្កូ របស់សហរដ្ឋអាមេរិក កាលពីព្រឹកថ្ងៃពុធ (១៥ វិច្ឆិកា) មុនពេលកិច្ចប្រជុំរវាងប្រធានាធិបតីសហរដ្ឋអាមេរិក លោក ចូ បៃដិន (Joe Biden) និងប្រធានាធិបតីចិន លោក ស៊ី ជីនពីង (Xi Jinping) ដោយរារាំង​ច្រកចូលមួយ​ចំនួនទៅកាន់សន្និសីទ នៃកិច្ចប្រជុំកំពូល APEC ។

បណ្ដាមេដឹកនាំពិភពលោក និងនាយកប្រតិបត្តិនៃសាជីវកម្មធំៗរបស់សហរដ្ឋអាមេរិកទាំងអស់ នឹងទៅ​ចូលរួមនៅក្នុងវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នោះ​ដោយ​បន្ថែម​នូវគោលដៅក្នុងការទាក់ទាញការតវ៉ា។

ក្រុមអ្នកប្រឆាំងរបស់លោកប្រធានាធិបតី ស៊ី សង្ឃឹមថា មនុស្សរាប់រយនាក់​នឹងធ្វើបាតុកម្ម​ប្រឆាំង​នឹង​គោលនយោបាយរបស់ចិន ខណៈដែល​អ្នកផ្សេងទៀ​តកំពុង​ប្រើប្រាស់​កិច្ចប្រជុំនេះ​ធ្វើជាវេទិកា​ សម្រាប់​បញ្ហាពិភពលោក ដូចជាសង្គ្រាមអ៊ីស្រាអែល-ក្រុមហាម៉ាសជាដើម។

មនុស្សប្រហែល ១៥០នាក់ បានប្រមូលផ្តុំគ្នានៅផ្លូវបំបែកមួយនៅ​ខាងក្រៅ​តំបន់សន្តិសុខ​នៅឯ​មជ្ឈមណ្ឌល​សន្និបាតរបស់ទីក្រុងនេះនៅម៉ោងប្រហែល ៨ព្រឹក (ម៉ោងក្នុងស្រុក)។ ក្រុមតវ៉ា​នេះមានគោលបំណងរារាំងអ្នកចូលរួមសន្និសីទមិនឱ្យឆ្លងកាត់ផ្លូវប្រសព្វ ហើយបាន​បង្កើតខ្សែ​សង្វាក់​មនុស្ស ដែលបង្វែរអ្នកធ្វើដំណើរ និងប្រតិភូមួយចំនួនឲ្យទៅតាមផ្លូវផ្សេង។

ទីក្រុងសាន់ហ្វ្រាន់ស៊ីស្កូ បានសម្អាតផ្លូវកណ្តាលក្រុងសម្រាប់កិច្ចប្រជុំ ហើយបានរៀបចំ​ សម្រាប់លទ្ធភាព នៃការប្រឈមមុខដាក់គ្នាជាមួយក្រុមបាតុករ ដោយមានរបាំងដែកកម្ពស់​ប្រាំបីហ្វីត​ត្រូវបានដំឡើង​ ដើម្បីការពារ​មនុស្សនៅលើ​ចិញ្ចើមផ្លូវពីការ​រំខានដល់​ចរាចរណ៍​យានយន្ត នៅជិតមជ្ឈមណ្ឌលសន្និបាត៕