ជំនួយស្បៀងអាហារ សម្រាប់ជនភៀសខ្លួនជាងកន្លះលាននាក់ ដែលបាន​ភៀសខ្លួន​ពី​ប្រទេស​ស៊ូដង់​ ទៅកាន់ប្រទេសឆាដ នឹងត្រូវអស់នៅខែក្រោយដោយមិនមានមូលនិធិបន្ថែមនោះទេ នេះ​បើ​តាម​មន្ត្រី​ម្នាក់ នៃកម្មវិធីស្បៀងអាហារពិភពលោក របស់អង្គការសហប្រជាជាតិ បាននិយា​យ​កាល​ពី​ថ្ងៃពុធ (១៥ វិច្ឆិកា)។

លោក Pierre Honnorat នាយកទីភ្នាក់ងារអង្គការសហប្រជាជាតិនៅប្រទេសឆាដ បាន​ប្រាប់​សារ​ព័ត៌មាន រ៉យទ័រ ថា «នៅខែធ្នូខាងមុខនេះនឹងមិនមានជំនួយទេ ហើយយើង​កំពុង​អំពាវនាវ​ឱ្យ​មាន​ការ​ផ្តល់ថវិកាជាបន្ទាន់បំផុតក្នុងពេលឥឡូវនេះ»។

ជន​ភៀសខ្លួនជាង ៥៤ម៉ឺននាក់ បានឆ្លងពីប្រទេសស៊ូដង់ ចូលទៅក្នុងប្រទេសឆាដ ចាប់តាំង​ពី​សង្គ្រាម​បាន​ផ្ទុះឡើងកាលពីប្រាំពីរខែមុនរវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា (RSF) នេះបើយោងតាមអង្គការអន្តរជាតិសម្រាប់ការធ្វើអន្តោប្រវេសន៍។

មនុស្ស​ជាច្រើនបានភៀសខ្លួនចេញពីទីក្រុង West Darfur ប្រទេសស៊ូដង់ ជាទីដែល​អំពើ​ហិង្សា​ជំរុញ​ដោយ​ជនជាតិភាគតិច និងការសម្លាប់រង្គាលបានផ្ទុះឡើងម្តងទៀតក្នុងខែនេះ ក្នុងរដ្ឋធានីរដ្ឋ El Geneina ដោយបានជំរុញឱ្យមនុស្សរាប់ពាន់នាក់ផ្សេងទៀតភៀសខ្លួន។

អ្នក​ដែលបានទៅដល់ប្រទេសឆាដ នៅឆ្នាំនេះ បានចូលរួមជាមួយជនភៀសខ្លួន និង​អ្នក​ផ្លាស់​ទីលំនៅ​​ផ្សេងទៀតនៅក្នុងជំរំនានាក្នុងប្រទេសឆាដ ជាទៅដែល​នាយក​ទីភ្នាក់​ងារ​អង្គការ​សហប្រជាជាតិ​នៅ​ប្រទេសឆាដ លោក Honnorat បានពណ៌នាថា​កំពុង​ជួប​ប្រទះ​លក្ខ​ខណ្ឌ​ដ៏ពិបាក​ខ្លាំង​៕