ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ បាន​អំពាវ​នាវ​ឲ្យ​មាន​ការ​ផ្អាក​សង្គ្រាម​បន្ទាន់ និង​បន្ថែមពេល សម្រាប់ការដឹកជញ្ជូនជំនួយមនុស្សធម៌ ក្នុងពេលមានការ​ប្រយុទ្ធ​គ្នា​រវាង​អ៊ីស្រអែល និងក្រុមសកម្មប្រយុទ្ធហាម៉ាស់ប៉ាឡេស្ទីន នៅក្នុងតំបន់​ហ្កាហ្សា​ សម្រាប់​រយៈ​ពេល​ច្រើន​ថ្ងៃ​គ្រប់គ្រាន់ ដើម្បីអនុញ្ញាតឲ្យដំណើរការជំនួយបានចូលទៅដល់តំបន់នេះ។

សហរដ្ឋអាមេរិក រុស្ស៊ី និងចក្រភពអង់គ្លេស ដែលជាក្រុម​ប្រឹក្សា​បាន​ប្រើ​សិទ្ធ​វ៉េតូ​ប្រទេស​មហា​អំណាច បោះឆ្នោតអនុបវាទក្នុងការបោះឆ្នោតកាលពីថ្ងៃពុធលើសេចក្តីសម្រេច ដែល​ពង្រាង​ដោយ​ប្រទេសម៉ាល់តា ហើយសមាជិក១២រូបដែលនៅសល់ បានបោះឆ្នោតគាំទ្រ។  

ឯកអគ្គរដ្ឋទូតលោក Vassily Nebenzia បាននិយាយទៅកាន់ក្រុមប្រឹក្សាថា ប្រទេសរុស្ស៊ី បាន​បរាជ័យ​ក្នុង​បំណង​នៅ​នាទី​ចុង​ក្រោយ ដើម្បី​ធ្វើ​វិសោធនកម្ម​សេចក្តី​សម្រេច​អំពាវ​នាវ​ឲ្យ​មាន​បទ​ឈប់​បាញ់ ដែលនាំទៅរកការផ្អាកការប្រយុទ្ធគ្នា។

សេចក្តីសម្រេចនេះ គឺជាការប៉ុនប៉ងរបស់ក្រុមប្រឹក្សាលើកទី៥ដើម្បីមានចំណាត់ការ ចាប់​តាំង​ពី​អ៊ីស្រា​អែល និយាយថាក្រុមសកម្មប្រយុទ្ធហាម៉ាស់ បានសម្លាប់មនុស្ស ១.២០០នាក់ និង​បាន​ចាប់​ចំណាប់​ថ្នូរប្រមាណ២៤០នាក់ ក្នុងការវាយប្រហារដ៏ភ្ញាក់ផ្អើល កាលពីថ្ងៃទី៧ ខែតុលា។

ឯកសារនេះ ពុំបានថ្កោលទោសការវាយប្រហាររបស់ក្រុមហាម៉ាស់នោះទេ ជាចំណុច​មួយ​នៃ​ការ​វិវាទ​សម្រាប់​សម្ព័ន្ធមិត្តអ៊ីស្រអែល មានសហរដ្ឋអាមេរិក និងចក្រភពអង់គ្លេស៕