ប្រធានាធិបតីអាមេរិក លោក ចូ បៃដិន (Joe Biden) កាលពីថ្ងៃពុធ (១៥ វិច្ឆិកា) បាននិយាយថា លោកបានបញ្ជាក់យ៉ាងច្បាស់ទៅកាន់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ថាដំណោះស្រាយរដ្ឋពីរ គឺជាចម្លើយតែមួយគត់ដើម្បីដោះស្រាយជម្លោះអ៊ីស្រាអែល និងប៉ាឡេស្ទីន ហើយការកាន់កាប់តំបន់ហ្កាហ្សា នឹងក្លាយជា «កំហុសឆ្គងដ៏ធំមួយ»។

លោក បៃដិន បានប្រាប់ក្រុមអ្នកយកព័ត៌មានថា លោកកំពុងធ្វើអ្វីៗគ្រប់យ៉ាងក្នុងអំណាចរបស់ខ្លួន ដើម្បីដោះលែងចំណាប់ថ្នូរដែលចាប់ខ្លួនដោយក្រុមសកម្មប្រយុទ្ធហាម៉ាស នៅតំបន់ហ្កាហ្សា ប៉ុន្តែនោះមិនមែនមានន័យថា លោកបញ្ជូនយោធាអាមេរិក ទៅហ្កាហ្សានោះទេ។

លោក បៃដិន បានបន្ថែមថា ក្រុមហាម៉ាស កំពុងប្រព្រឹត្តឧក្រិដ្ឋកម្មសង្រ្គាម ដោយមានទីស្នាក់ការយោធារបស់ខ្លួននៅក្រោមមន្ទីរពេទ្យ ដោយបានរំលឹកឡើងវិញនូវសេចក្តីថ្លែងការណ៍មួយដែលបានធ្វើឡើងដោយអ្នកនាំពាក្យសេតវិមានកាលពីថ្ងៃអង្គារ ហើយលោកមានទំនុកចិត្តលើការស៊ើបការណ៍ចារកម្មសម្ងាត់របស់សហរដ្ឋអាមេរិក ដែលគាំទ្រ «ការពិត» ជុំវិញទីស្នាក់ការយោធាហាម៉ាស នោះ។

អ៊ីស្រាអែល កាលពីថ្ងៃពុធ បាននិយាយថា កងទ័ពរបស់ខ្លួនបានរកឃើញអាវុធ និងគ្រឿងយុទ្ធោបករណ៍ប្រយុទ្ធជាច្រើនរបស់ក្រុមហាម៉ាស នៅក្នុងមន្ទីរពេទ្យហ្កាហ្សា អាល់ស៊ីហ្វា (Al Shifa) អំឡុងពេលប្រតិបត្តិការស្វែងរកកាលពីថ្ងៃពុធ ប៉ុន្តែក្រុមហាម៉ាស បានច្រានចោលការប្រកាសនេះថាជារឿង «កុហក»។

ប្រធានាធិបតីអាមេរិករូបនេះបានបញ្ជាក់ថា លោកបានប្រាប់លោកនាយករដ្ឋមន្រ្តី ណាតាន់យ៉ាហ៊ូ ថាលោកមិនជឿថា សង្រ្គាមនឹងបញ្ចប់នោះទេរហូតដល់ដំណោះស្រាយរដ្ឋពីរ ត្រូវបានសម្រេច៕