នៅក្នុងការឆ្លើយតបទៅនឹងកិច្ចប្រជុំ រវាងមេដឹកនាំនៃប្រទេសមហាអំណាចពិភពលោកទាំង២ គឺប្រធានាធិបតីអាមេរិក លោក ចូ បៃដិន និងប្រធានាធិបចិន លោ ស៊ី ជីនពីង ក្រសួងការបរទេសរបស់កោះតៃវ៉ាន់ នៅថ្ងៃព្រហស្បតិ៍ (ទី១៦ ខែវិច្ឆិកា) នេះ បាននិយាយថា រដ្ឋាភិបាលរបស់ខ្លួនមិនដែលព្យាយាមទស្សន៍ទាយថា តើ ឬនៅពេលណាដែលចិន អាចនឹងធ្វើការវាយប្រហារនោះ តែផ្តោតលើការពង្រឹងការការពាររបស់ខ្លួន និងការទទួលបានការគាំទ្រពីអន្តរជាតិជំនួសវិញ។

ក្នុងន័យស្វាគមន៍ដល់ជំនួបនោះ អ្នកនាំពាក្យក្រសួងការបរទេសរបស់កោះតៃវ៉ាន់ លោក Jeff Liu បាននិយាយនៅទីក្រុងតៃប៉ិថា នេះគឺដើម្បី «ឲ្យចិនយល់» ពីសារៈសំខាន់ខ្លាំងនៃទំនាក់ទំនងឆ្លងច្រកសមុទ្រ និងពី «តម្លៃខ្ពស់នៃការចាប់ផ្តើមសង្រ្គាម និងដើម្បីកុំឲ្យធ្វើអ្វីដោយមិនគិតមុខគិតក្រោយ»។ លោក Liu បន្ថែមទៀតថា កោះតៃវ៉ាន់ទាំងមិនបង្ករឿង ឬទាំងមិន «ធ្វើដំណើរទៅមុខដោយប្រញាប់ប្រញាល់» តែក៏មិនចុះញ៉មជាមួយសម្ពាធនោះដែរ។

ប្រធានាធិបតីអាមេរិកលោក ចូ បៃដិន និងសមភាគីចិនរបស់លោក គឺលោក ស៊ី ជីនពីង បានជួបប្រជុំគ្នា ផ្ទាល់មុខជាលើកដំបូង ក្នុងរយៈពេល ១ឆ្នាំ កាលពីថ្ងៃពុធ (ទី១៥ ខែវិច្ឆិកា) ដែលជាកិច្ចពិភាក្សាក្នុងគោលបំណងបន្ធូរបន្ថយភាពតានតឹង រវាងមហាអំណាចទាំង២ ជុំវិញជម្លោះយោធា ការជួញដូរគ្រឿងញៀន និងបញ្ញាសិប្បនិម្មិត (AI) ហើយបានឲ្យដឹងថា ប្រទេសទាំង២ បានធ្វើឲ្យមាននូវ «ភាពរីកចម្រើនពិតប្រាកដ» ក្នុងជំនួបនេះ៕