មន្ទីរពេទ្យមួយក្នុងរដ្ឋធានីព័រអូប្រាំង (Port-au-Prince) នៃប្រទេសហៃទី ត្រូវបាននគរបាលជម្លៀសចេញ បន្ទាប់ពីមានអំពើហិង្សារបស់ក្រុមជនអន្ធពាល នៅក្បែរនោះ។

ប្រធានមន្ទីរពេទ្យលោក Jose Ulysse បាននិយាយថា អ្នកជំងឺជាង ១០០នាក់ ដែលជិតពាក់កណ្តាលនៃពួកគេ ជាកុមារ ត្រូវបញ្ជូនចេញពីមជ្ឈមណ្ឌលមន្ទីរពេទ្យ Fontaine។   

មន្ទីរពេទ្យនេះ ស្ថិតនៅក្នុងទីក្រុងCite Soleil ដែលជាកន្លែងមានសេចក្តីរាយការណ៍ពីភាពចលាចលក្នុងប៉ុន្មានថ្ងៃថ្មីៗនេះ បន្ទាប់ពីការស្លាប់របស់មេក្រុមជនអន្ធពាល។

បច្ចុប្បន្ន ប្រទេសហៃទី កំពុងស្ថិតនៅក្រោមភាពគ្មានច្បាប់ច្រើនកម្រិត ដែលមិនធ្លាប់មានពីមុនមក។

លោក Ulysse បានប្រាប់ទីភ្នាក់ងារព័ត៌មាន AFP ថា៖«មានសង្រ្គាមរបស់ក្រុមជនអន្ធពាល ប៉ុន្តែសង្គ្រាមគឺនៅជុំវិញមន្ទីរពេទ្យ ដោយបញ្ជាក់ពីរបាយការណ៍មុនថា ក្រុមជនអន្ធពាល បានចូលក្នុងមន្ទីរពេទ្យ និងចាប់មនុស្ស ជាថ្នូរ»។

លោក បាននិយាយថា ផ្ទះនៅជុំវិញមន្ទីរពេទ្យ ត្រូវបានភ្លើងឆេះ ហើយខណៈដែលមនុស្សមួយចំនួន អាចរត់ចេញពីកន្លែងនោះ បានដោយខ្លួនឯង អ្នកខ្លះទៀតរួមទាំងស្ត្រី ដែលបានសម្រាលកូនដោយការវះកាត់ កាលពីមួយថ្ងៃមុន ត្រូវការជំនួយពីអាជ្ញាធរមូលដ្ឋាន។