មនុស្សរាប់ពាន់មកពីសហភាពមីយ៉ាន់ម៉ា កំពុងស្វែងរកទីជម្រកនៅរដ្ឋ Mizoram ភាគឦសានប្រទេសឥណ្ឌា បន្ទាប់ពីកងទ័ពមីយ៉ាន់ម៉ា បើកការវាយប្រហារតាមអាកាស ក្រោយពីមានការវាយប្រហារដោយក្រុមឧទ្ទាមប្រដាប់អាវុធគាំទ្រលទ្ធិប្រជាធិបតេយ្យ។ ឧត្តមសេនីយ៍មីយ៉ាន់ម៉ា ជាច្រើនរូបកំពុងប្រឈមមុខការសាកល្បងធំបំផុត ចាប់តាំងពីពួកគេដណ្តើមអំណាចក្នុងរដ្ឋប្រហារឆ្នាំ២០២១ បន្ទាប់ពីកងកម្លាំងជនជាតិភាគតិច បើកការវាយលុកដូចគ្នា កាលពីចុងខែតុលា ដណ្តើមបានក្រុង និងប៉ុស្តិ៍យោធាមួយចំនួន។

ជនភៀសខ្លួនមកពីសហភាពមីយ៉ាន់ម៉ា ដែលបច្ចុប្បន្នេះកំពុងរស់នៅក្នុងស្រុក Champhai នៅព្រំដែនឥណ្ឌូ-មីយ៉ាន់ម៉ា បាននិយាយថា ពួកគេទទួលបានជំនួយជាច្រើនពីពលរដ្ឋក្នុងតំបន់នៅរដ្ឋ Mizoram ។

ជនភៀសខ្លួនជាស្រ្តីម្នាក់ ដែលគិតថាវាលំបាកក្នុងការដែលត្រឡប់ទៅប្រទេសរបស់នាងវិញ និយាយថា ពលរដ្ឋក្នុងតំបន់នេះទាំងអស់ បានជួយយើងច្រើន ហើយបានផ្តល់ឲ្យយើងនូវអ្វីដែលយើងត្រូវការ។

ជនភៀសខ្លួនភាគច្រើន ពេលនេះកំពុងរស់នៅក្នុងជំរំផ្លាស់ប្តូរបណ្តោះអាសន្ន ក្នុងស្រុក Champai រដ្ឋ Mizoram។

កងកម្លាំងក្រុមឧទ្ទាមនៅក្នុងរដ្ឋ Chin សហភាពមីយ៉ាន់ម៉ា តាមសេចក្តីរាយការណ៍ ដណ្តើមបានការគ្រប់គ្រងចំណុចឆ្លងកាត់ព្រំដែន រវាងប្រទេសទាំងពីរ ក្នុងរដ្ឋ Mizoram។

ខណៈភាពស្ងប់ស្ងាត់ បានត្រឡប់មកវិញភាគច្រើននៅតំបន់ជ្រលងភ្នំដ៏ស្ងាត់តាមបណ្តោយព្រំដែនឥណ្ឌូ-មីយ់ាន់ម៉ា កាលពីរសៀលថ្ងៃពុធ ស៊ីរ៉ែនវាយឆ្មក់តាមអាកាស អាចត្រូវបានគេលឺនៅភូមិ Zokhawthar ប្រទេសឥណ្ឌា មកពីផ្នែកសហភាពមីយ៉ាន់ម៉ា ដោយព្រមានពលរដ្ឋអំពីការវាយប្រហារខ្លាំងធ្វើឡើងដោយយោធា។