អង្គការលើកលែងទោសអន្តរជាតិ បានរៀបចំបាតុកម្មមួយនៅថ្ងៃព្រហស្បតិ៍ ទី១៥ ខែវិច្ឆិកានេះ ដែលរូបសំណាកជាច្រើនរុំដោយក្រណាត់ស ត្រូវបានដាក់នៅខាងក្រៅសេតវិមានដើម្បីបង្ហាញឱ្យឃើញ សាកសពរបស់ពលរដ្ឋប៉ាឡេស្ទីនរាប់ពាន់នាក់ ដែលបានស្លាប់ចាប់តាំងពីសង្គ្រាមអ៊ីស្រាអែល និងក្រុមហាម៉ាស បានចាប់ផ្តើម។

ក្រុមបាតុករ បានដាក់ផ្កាកុលាបនៅលើទីតាំងទម្រ ហើយក្រោយមកបានដាក់ទៀននៅចន្លោះនោះ ខណៈពួកគេទាមទារឱ្យប្រធានាធិបតីសហរដ្ឋអាមេរិក លោក Joe Biden អំពាវនាវឱ្យមានបទឈប់បាញ់បន្ទាន់នៅក្នុងជម្លោះនៅហ្កាហ្សា។

អ្នកគ្រប់គ្រងយុទ្ធនាការជាន់ខ្ពស់របស់អង្គការលើកលែងទោសអន្តរជាតិ លោក Isra Chaker បាននិយាយថា ក្រុមនេះ កំពុងអំពាវនាវឱ្យរដ្ឋាភិបាលអ៊ីស្រាអែល អនុញ្ញាតឱ្យជំនួយមនុស្សធម៌គ្មានការរារាំងបានចូលទៅដល់តំបន់ហ្កាហ្សា បន្ទាប់ពីការទម្លាក់គ្រាប់បែកជាច្រើនសប្តាហ៍ដោយអ៊ីស្រាអែល ដែលដាក់គោលដៅទៅលើក្រុមហាម៉ាស់។ សហរដ្ឋអាមេរិក និយាយថា បទឈប់បាញ់ជាទូទៅនឹងមិនសមស្របនោះទេ ទោះបីជាខ្លួនបានជំរុញឱ្យមានការផ្អាកការប្រយុទ្ធគ្នាដើម្បីដឹកជញ្ចូនជំនួយមនុស្សធម៌ក៏ដោយ។

អ៊ីស្រាអែល បានដាក់ពង្រាយកម្លាំងបាញ់ពីលើអាកាសដ៏លើសលប់ ចាប់តាំងពីការវាយប្រហារ កាលពីថ្ងៃទី ៧ ខែតុលា ដែលឃើញខ្មាន់កាំភ្លើងក្រុមហាម៉ាស់បានផ្ទុះចេញពីតំបន់ហ្កាហ្សា ដោយបានសម្លាប់ពលរដ្ឋអ៊ីស្រាអែល ១.២០០នាក់ និងចាប់ចំណាប់ថ្នូរ ២៣៩ នាក់។

មន្ត្រីសុខាភិបាលតំបន់ហ្កាហ្សា បាននិយាយថា មនុស្ស ១១.០០០នាក់ ត្រូវបានសម្លាប់ចាប់តាំងពីជម្លោះចាប់ផ្តើម។