រដ្ឋាភិបាលអូស្ត្រាលី នៅថ្ងៃព្រហស្បតិ៍ (១៦ វិច្ឆិកា) បានប្រាប់ថា ខ្លួននឹងដាក់ចេញនូវច្បាប់ ដែលនឹងអនុញ្ញាតឲ្យមានការបំពាក់ខ្សែកជើង បម្រាមគោចរ និងគោលការណ៍ផ្សេងទៀត ដើម្បីតាមដានជនបរទេសរាប់សិបនាក់ ដែលមានប្រវត្តិឧក្រិដ្ឋកម្ម បន្ទាប់ពីតុលាការដោះលែងពួកគេពីការឃុំខ្លួនជនអន្តោប្រវេសន៍ដោយមិនមានកំណត់។

សាលក្រមរបស់តុលាការកំពូល កាលពីសប្តាហ៍មុន បានលើកឡើងថា ការឃុំខ្លួនជនអន្តោប្រវេសន៍ដោយមិនមានកំណត់ ដែលត្រូវបានអនុវត្តដោយអូស្ត្រាលីអស់រយៈពេលជាង ២ទសវត្សរ៍ គឺខុសច្បាប់។ សេចក្ដីសម្រេចនោះបានបង្ខំឲ្យរដ្ឋាភិបាលដោះលែងជនបរទេសចំនួន ៨៣នាក់ ក្នុងនោះរួមទាំងអ្នកដែលត្រូវបានផ្ដន្ទាទោសពីបទឧក្រិដ្ឋ ដូចជាឃាតកម្ម និងការរំលោភបំពានផ្លូវភេទ ទាំងនៅក្នុងប្រទេសអូស្ត្រាលី និងក្រៅប្រទេស ហើយបទបញ្ជានោះបង្កឲ្យមានប្រតិកម្មខ្លាំងក្លាជាសាធារណៈ និងខាងនយោបាយ។

បើយោងតាមរដ្ឋាភិបាល បានឲ្យដឹងថា បុគ្គលដែលត្រូវបានដោះលែងទាំងអស់នោះ បានឆ្លងកាត់រយៈពេលនៃការជាប់ពន្ធនាគាររបស់ពួកគេរួចហើយ នៅអូស្ត្រាលី ប៉ុន្តែនៅតែស្ថិតក្រោមការឃុំខ្លួន និងមិនត្រូវបានផ្តល់ទិដ្ឋាការ ដោយសារតែមានការព្រួយបារម្ភអំពីបុគ្គលិកលក្ខណៈរបស់ពួកគេ ឬអំពីហានិភ័យ ដែលអាចកើតមាន ចំពោះសន្តិសុខជាតិ៕