បើយោងតាមសេវាសង្គ្រោះបន្ទាន់របស់អ៊ីស្រាអែល នៅថ្ងៃព្រហស្បតិ៍ (ទី១៦ ខែវិច្ឆិកា) នេះ បានឲ្យដឹងថា រថយន្តសង្គ្រោះបន្ទាន់ បានប្រញាប់ប្រញាល់ដឹកអ្នករបួសទៅកាន់មន្ទីរពេទ្យក្រុងហ្សេរុយសាឡិម បន្ទាប់ពីជនសង្ស័យប៉ាឡេស្ទីន ៣នាក់ បានបើកការបាញ់ប្រហារនៅប៉ុស្តិ៍ត្រួតពិនិត្យ ដែលស្ថិតនៅលើផ្លូវធំមួយ រវាងទីក្រុងហ្សេរុយសាឡិម និងទីក្រុង Bethlehem (បេស្លើហែម) របស់តំបន់វ៉េសបែង ដោយបណ្តាលឲ្យមនុស្ស ៦នាក់រងរបួស។

ក្រោយកើតហេតុការណ៍នោះ នគរបាលបាននិយាយថា កម្លាំងសន្តិសុខបានបើកការបាញ់ប្រហារទៅលើជនបង្កហេតុនោះ។ នគរបាលអ៊ីស្រាអែលបានប្រាប់ថា៖ «ភេរវករទាំង ៣នាក់នោះ ត្រូវបានបាញ់សម្លាប់ដោយកងកម្លាំងសន្តិសុខដែលឈរជើងនៅច្រកឆ្លងកាត់នោះ។ ហេតុការណ៍នេះបានកើតឡើងបន្ទាប់ពីជនទាំងនោះបានទៅដល់តាមរយៈរថយន្តគួរឲ្យសង្ស័យមួយ ហើយបានបើកការបាញ់ប្រហារមកលើកងកម្លាំងរបស់យើង»។

សេវារថយន្តសង្គ្រោះរបស់អ៊ីស្រាអែល បានឲ្យដឹងបន្ថែមថា ក្នុងចំណោមអ្នករបួសទាំងនោះ មានម្នាក់ស្ថិតក្នុងសភាពធ្ងន់ធ្ងរ។ ជាមួយគ្នានេះ មិនទាន់មានការកំណត់អត្តសញ្ញាណជនរងគ្រោះនៅឡើយទេ។ ពាក់ព័ន្ធនឹងការការបាញ់ប្រហារនេះ ភ្លាមៗនេះ មិនទាន់មានការអត្ថាធិប្បាយអ្វីពីមន្ត្រីប៉ាឡេស្ទីននោះទេ៕