ភ្នំពេញ៖ ក្រសួងសុខាភិបាល បានប្រកាសច្រានចោលទាំងស្រុង ចំពោះការចែកចាយតាមបណ្ដាញទំនាក់ទំនងសង្គម កាលពីថ្ងៃទី៩ និងទី១០ ខែមិថុនា ឆ្នាំ២០២១ ដែលបានលើកឡើងថា សិង្ហបុរីបានក្លាយជាប្រទេសដំបូងគេ នៅលើពិភពលោក ដែលធ្វើកោសល្យវិចយលើសាកសព ដែលមានជំងឺកូវីដ-១៩ រកឃើញថា កូវីដ-១៩ មិន មែនជាវីរុសទេ ប៉ុន្តែជាបាក់តេរី ដែលត្រូវបានប៉ះពាល់នឹងវិទ្យុសកម្ម និងបញ្ចូលឈាមបណ្ដាលឱ្យមនុស្សស្លាប់ ព្រមទាំងអាចបណ្ដាលឱ្យឈាមរបស់មនុស្សកក និងកំណកឈាមនោះធ្វើឱ្យមនុស្សពិបាកដកដង្ហើម ព្រោះខួរ ក្បាល បេះដូង និងសួត មិនអាចទទួលបានអុកស៊ីហ្សែន ធ្វើឱ្យមនុស្សស្លាប់យ៉ាងឆាប់រហ័ស។
ប្រភពដដែលបានចាត់ទុកថា ព័ត៌មាននេះជាព័ត៌មានមិនពិត ក្លែងបន្លំ និងបំពុលសង្គម នៅក្នុងដំណាក់កាល ដែលបណ្ដាប្រទេសនៅលើសកលលោក បាននិងកំពុងរងគ្រោះដោយការរាតត្បាតពីវីរុសកូវីដ-១៩។
ក្រសួងសុខាភិបាលបញ្ជាក់បន្ថែមថា រហូតមកដល់ពេលនេះ សូម្បីតែអង្គការសុខភាពពិភពលោក ក៏នៅតែពន្យ ល់ថា ជំងឺកូវីដ-១៩ ជាជំងឺបង្កឡើងដោយវីរុសកូវីដ-១៩ មិនមែនជាបាត់តេរីនោះឡើយ ហើយដែលគេមិនទាន់ រកឃើញឱសថសម្រាប់ព្យាបាលជាក់លាក់ណាមួយនោះឡើយ។
ក្រសួងក៏បានស្នើសាធារណជនសូមកុំបន្តចែកចាយព័ត៌មាននេះ ដែលធ្វើឱ្យមានការភ័ន្តច្រឡំ និងច្របូកច្របល់ សាធារណៈមតិ៕ អត្ថបទៈ គង់ ឌិន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
