សម្រាប់អ្នកស្រី Darya Stepanova គឺជាម្តាយកូន ២នាក់រស់នៅក្នុងទីក្រុងតូចនៅភាគខាងកើតតំបន់ភ្នំ Ural តម្លៃទំនិញឡើងខ្ពស់សម្រាប់អ្វីៗគ្រប់បែបយ៉ាង ចាប់ពីទឹកដោះគោ រហូតដល់ខោទឹកនោម បានបង្ខំឲ្យគ្រួសាររបស់គាត់កាត់បន្ថយការចំណាយច្រើន និងការទទួលទានអាហារខាងក្រៅ ស្របពេលដែលការបោះឆ្នោតខិតជិតមកដល់ ។

គ្រួសាររបស់អ្នកស្រី Stepanov ស្ថិតនៅក្នុងចំណោមពលរដ្ឋរុស្ស៊ីរាប់លានគ្រួសារ ដែលត្រូវកាត់បន្ថយការចំណាយ ដោយសារការផ្លាស់ប្តូរសេដ្ឋកិច្ចរុស្ស៊ី បណ្តាលមកពីសង្រ្គាមនៅអ៊ុយក្រែន ហើយនិងទណ្ឌកម្មជាច្រើនដាក់ដោយលោកខាងលិច ។

អ្នកស្រី Stepanova វ័យ ៣៤ឆ្នាំ ដែលមានកូនប្រុសអាយុ ៥ឆ្នាំម្នាក់ និងទារកទើបកើតម្នាក់ ព្យាយាមរឹតត្បិតការចំណាយប្រាក់ ៥ម៉ឺនរូប្លិ៍(ស្មើនឹង ៥៥០ដុល្លារ)ដែលប្តីរបស់គាត់រកបានក្នុង១ខែ ។ ពេលគាត់ដើរកាត់ព្រិលទៅកាន់ហាងលក់ទំនិញ គាត់ព្យាយាមរកមើលទំនិញណាដែលលក់បញ្ចុះតម្លៃ ។

អ្នកស្រី Stepanova និយាយប្រាប់ទីភ្នាក់ងារព័ត៌មានរ៉យទ័រនៅក្នុងផ្ទះល្វែងរបស់គាត់ ស្ថិតនៅក្នុងទីក្រុង Sredneuralsk គឺជាទីក្រុងស្ថិតនៅតាមមាត់បឹង Iset ដែលមានចម្ងាយប្រហែល ២៥គ.មភាគខាងជើងទីក្រុង Yekaterinburg នៃតំបន់ភ្នំ Urals និងមានចម្ងាយប្រហែល ១.៤០០គ.មភាគខាងកើតទីក្រុងម៉ូស្គូថា ខ្ញុំមើលឃើញអ្វីៗគ្រប់បែបយ៉ាងឡើងថ្លៃបែបណានៅក្នុងរយៈពេលត្រឹម ៥ឆ្នាំកន្លងមកនេះ ។

អ្នកស្រីបន្តថា កាលពីមុនអ្នកអាចទិញអាហារអស់ប្រាក់ ១ពាន់រូប្លិ៍សម្រាប់រយៈពេល ៣ ឬ៤ថ្ងៃបានយ៉ាងស្រួល ប៉ុន្តែបច្ចុប្បន្នពេលដែលដើរផ្សារ ១ពាន់រូប្លិ៍ គ្មានទិញបានអី្វសោះ ។

អ្នកស្រីបញ្ជាក់ថា តម្លៃទឹកដោះគោកូន បានកើនឡើង ៤ដង ក្នុងរយៈពេល ៥ឆ្នាំកន្លងមកនេះ ចាប់តាំងពីកូនដំបូងរបស់ខ្ញុំ ខណៈដែលតម្លៃរទេះរុញកូនក្មេង បានកើនឡើង ៣ដងរហូតដល់ ៦ម៉ឺនរូប្លិ៍ ។

ប្រាក់ចំណូលរបស់គ្រួសាររុស្ស៊ីបច្ចុប្បន្ន ពុំបានកើនឡើងនោះទេ ខណៈដែលប្រាក់រូប្លិ៍ធ្លាក់ថ្លៃទល់នឹងប្រាក់ដុល្លារសហរដ្ឋអាមេរិក ចាប់តាំងពីខែកុម្ភៈ ឆ្នាំ ២០២២មកម្ល៉េះ ពេលដែលលោកប្រធានាធិបតី Vladimir Putin បញ្ជាឲ្យទាហានរុស្ស៊ីវាយលុកចូលអ៊ុយក្រែន ធ្វើឲ្យទំនិញនាំចូល ឡើងថ្លៃទ្វេដង ៕