លោក Iwan Sophian ដែលជាវិចត្រករផ្ទាំងគំនូរ បានបាញ់ថ្នាំពណ៌នៅលើជញ្ជាំងតាមដងផ្លូវដ៏មមាញឹកនៅទីក្រុង Depok ស្ថិតក្នុងខេត្តជ្វាខាងលិច ប្រទេសឥណ្ឌូនេស៊ី ដៃរបស់លោកធ្វើការយ៉ាងរស់រវើក ពេលលោកព្យាយាមបញ្ចប់ផ្ទាំងគំនូររបស់លោក ដែលជារូបគំនូរមុខកូនក្មេងនៅលើទង់ជាតិប៉ាឡេស្ទីន ។

ដូចគ្នានឹងមនុស្សជាច្រើនទៀតនៅជុំវិញពិភពលោកដែរ វិចិត្រករផ្ទាំងគំនូរឥណ្ឌូនេស៊ីវ័យ ៤២ឆ្នាំរូបនេះ មានការភ្ញាក់ផ្អើលយ៉ាងខ្លាំងចំពោះជម្លោះអ៊ីស្រាអែល-ក្រុមហាម៉ាស់ ដែលបានចាប់ផ្តើមឡើងក្រោយក្រុមជីវពលរបស់ប៉ាឡេស្ទីនមួយនេះ វាយឆ្មក់តំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ដោយបានសម្លាប់មនុស្ស ១.២០០នាក់ និងមនុស្សប្រហែល ២៤០នាក់ផ្សេងទៀត ត្រូវបានចាប់ជាចំណាប់ថ្នូរ ដែលជាថ្ងៃស្លាប់មនុស្សច្រើនបំផុតនៅក្នុងប្រវត្តិសាស្រ្តរយៈពេល ៧៥ឆ្នាំរបស់អ៊ីស្រាអែល ។

ចាប់តាំងពីពេលនោះមក អ៊ីស្រាអែល បានចាប់ផ្តើមប្រតិបត្តិការសឹករបស់ពួកគេប្រឆាំងនឹងក្រុមជីវពលហាម៉ាស់នៅក្នុងតំបន់ហ្គាហ្សា ហើយសន្យាថានឹងធ្វើឲ្យក្រុមសកម្មប្រយុទ្ធអ៊ីស្លាមមួយនេះរលាយសាបសូន្យពីលើផែនដី ។ អ៊ីស្រាអែល បានដាក់ប្រជាជនទាំង ២,៣លាននាក់នៅតំបន់ហ្គាហ្សា ឲ្យស្ថិតនៅក្រោមការហ៊ុមព័ទ្ធ និងបានបាញ់ផ្លោងដោយការវាយប្រហារតាមអាកាស ។

លោក Awenk និយាយថា ពេលនៅឆ្ងាយពីជម្លោះមួយនេះ លោកមានអារម្មណ៍ថាជួយអ្វីមិនកើតនោះទេ បានត្រឹមតែមើលឃើញភាពតក់ស្លុតដែលចាក់ផ្សាយនៅលើបណ្តាញព័ត៌មាន ហើយលោកក៏បានសម្រេចចិត្តប្រើប្រាស់ស្នាដៃគំនូររបស់លោក ដើម្បីបង្ហាញការគាំទ្រដល់ជនប៉ាឡេស្ទីន ។

សូមបញ្ជាក់ថា មន្ត្រីសុខាភិបាលតំបន់ហ្គាហ្សា បាននិយាយថាពលរដ្ឋប៉ាឡេស្ទីន ប្រមាណ១១.៥០០នាក់ ត្រូវបានសម្លាប់ ក្នុងនោះ ៤០ភាគរយនៃពួកគេ គឺជាកុមារ ៕