បាល់ទាត់៖ ពានរង្វាន់ League Cup 2021 នឹងបន្ដការប្រកួតសន្សំពិន្ទុសប្ដាហ៍ទី២ នាចុងសប្ដាហ៍នេះ ដោយក្រុមវិសាខាត្រូវបើកទ្វារផ្ទះទទួលក្រុមភ្នំពេញក្រោន នាថ្ងៃទី១២ ខែមិថុនា ខណៈព្រះខ័នរាជស្វាយរៀងត្រូវជួបក្រុមម្ចាស់ផ្ទះខេត្តព្រៃវែង នៅទីលានវិទ្យាស្ថានជាតិអប់រំកាយ និងកីឡានាថ្ងៃទី១៣ ខែមិថុនានាវេលាម៉ោង ៣៖៣០នាទីរសៀលដូចគ្នា។
វិសាខានឹងត្រូវធ្វើការប្រកួតដំបូងរបស់ខ្លួនក្នុងពូល A បន្ទាប់ពីប្រកួតបើកឆាកជាមួយបឹងកេត ត្រូវបានលុបចោល។ រីឯភ្នំពេញក្រោនត្រូវប្រកួតលើកទី២ របស់ខ្លួន បន្ទាប់ពីយកឈ្នះក្រុម ISI ដង្កោសែនជ័យ ៥-០ កាលពីថ្មីៗ។ បច្ចុប្បន្នក្រុមទាំងពីរមាន ៣ពិន្ទុស្មើគ្នា ដូច្នេះការប្រកួតស្អែកនេះក្រុមទទួលបានជ័យជម្នះ នឹងបានកក់កៅអីវគ្គពាក់កណ្ដាលផ្ដាច់ព្រ័ត្រតែម្ដង។ ចំណែកក្រុមព្រះខ័នរាជស្វាយរៀងក៏ដូចក្រុមវិសាខាដែរ ដែលនឹងត្រូវធ្វើការប្រកួតដំបូងក្នុងពូល B បន្ទាប់ពីប្រកួតបើកឆាកជាមួយក្រុមយុវជនសាលាបាល់ទាត់ជាតិបាទី ត្រូវបានលុបចោល។ រីឯខេត្តព្រៃវែងប្រកួតបើកឆាករបស់ពួកគេ គឺបានចាញ់ក្រុមកងយោធពលខេមរភូមិន្ទ ១-០។ យ៉ាងណាក្ដីព្រះខ័នរាជស្វាយរៀងក៏មាន ៣ពិន្ទុក្នុងដៃដែរ ដូច្នេះពួកគេត្រូវការ ៣ពិន្ទុទៀតប៉ុណ្ណោះដើម្បីកក់កៅអីវគ្គពាក់កណ្ដាលផ្ដាច់ព្រ័ត្រ។
គួរបញ្ជាក់ថា ពានរង្វាន់ League Cup 2021 រៀបចំឡើងអំឡុងពេលក្រុមជម្រើសជាតិកម្ពុជា ជាប់បេសកកម្មប្រកួតក្រៅប្រទេស ស្របពេលក្រុមបាល់ទាត់តំណាងកម្ពុជា ២ រួមមានក្រុមវិសាខា និងបឹងកេតត្រូវចូលរួមប្រកួតពានរង្វាន់ AFC Cup 2021។ ដោយហេតុនេះ គណៈកម្មការប្រកួតបាល់ទាត់ជាតិកម្ពុជា-CNCC ក៏រៀបចំពាននេះឡើងដើម្បីផ្ដល់ឱកាសឲ្យក្រុម ពិសេសកីឡាករមិនសូវមានឱកាសលេងក្នុងលីគបានបង្ហាញសមត្ថភាព ក៏ដូចជាត្រៀមស្វាគមន៍ការត្រឡប់មកវិញនៃពានរង្វាន់មិត្តហ្វូនខេមបូឌានលីគផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
