ស៊ីហ្គេម៖ កម្ពុជាបានប្រកាសជំហរយ៉ាងមុតមាំ នឹងធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២៣ តាមការកំណត់ ដោយនឹងរៀបចំពិធីបើកការប្រកួតនៅថ្ងៃទី៥ ខែឧសភា និងពិធីបិទនៅថ្ងៃទី១៧ ខែឧសភា ឆ្នាំ២០២៣ ទោះបីព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាមនាចុងឆ្នាំ២០២១ នេះមានការប្រែប្រួល ឬពន្យារពេលក៏ដោយ។ នេះបើតាមការអះអាងរបស់ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) ក្នុងកិច្ចប្រជុំគណៈអចិន្ត្រៃយ៍សហព័ន្ធកីឡាអាស៊ីអាគ្នេយ៍កាលពីថ្មីៗ។
ឯកឧត្ដម វ៉ាត់ ចំរើន បានថ្លែងចំពោះមុខថ្នាក់ដឹកនាំ គណៈកម្មាធិការជាតិអូឡាំពិកគ្រប់បណ្ដាប្រទេសក្នុងតំបន់អាស៊ានថា កម្ពុជាមិនមានការសម្រេចចិត្តអ្វីឡើយ ចំពោះការចង់ពន្យាពេលស៊ីហ្គេមរបស់ម្ចាស់ផ្ទះវៀតណាម តែអ្វីដែលសំខាន់ កម្ពុជាគឺរក្សាជំហរក្នុងការរៀបចំស៊ីហ្គេមឆ្នាំ២០២៣ តាមការកំណត់មិនបោះបង់ឡើយ។ ប៉ុន្តែបើមានការប្រែប្រួលអ្វីមួយ លុះត្រាតែមានការស្នើសុំគោលការណ៍ពីរាជរដ្ឋាភិបាលសិន ព្រោះការរៀបចំស៊ីហ្គេមម្ចាស់ផ្ទះមានសិទ្ធសម្រេចរាល់ការងាររៀបចំផ្សេងៗ។ ជាមួយការប្រកាន់ជំហរបែបនេះ ត្រូវបានបណ្ដាប្រទេសសមាជិកអាស៊ានជាច្រើនសម្ដែងការគាំទ្រកម្ពុជា ដោយពួកគេសង្ឃឹមថា ស៊ីហ្គេមឆ្នាំ២០២៣ នៅកម្ពុជានឹងពុំមានការប្រែប្រួលអ្វីឡើយ។ លើសពីនេះ ប្រទេសសមាជិកអាស៊ានទាំងនោះ ក៏បានវាយតម្លៃខ្ពស់ចំពោះការត្រៀមខ្លួនយ៉ាងល្អ ក្នុងដំណើរដ៏ស្វាហាប់ឆ្ពោះទៅធ្វើម្ចាស់ផ្ទះជាប្រវត្តិសាស្ត្រ នៃព្រឹត្តិការណ៍ប្រចាំតំបន់អាស៊ីអាគ្នេយ៍នេះផងដែរ។ នេះបើតាមការបញ្ជាក់របស់ឯកឧត្ដម វ៉ាត់ ចំរើន ក្រោយបញ្ចប់កិច្ចប្រជុំតាមប្រព័ន្ធអនឡាញ កាលពីថ្ងៃពុធកន្លងទៅ ។
គួរបញ្ជាក់ថា កាលពីថ្ងៃទី៩ ខែមិថុនាកន្លងទៅ គណៈអចិន្ត្រៃយ៍សហព័ន្ធកីឡាអាស៊ីអាគ្នេយ៍ បានបើកកិច្ចប្រជុំបន្ទាន់មួយ ដើម្បីពិភាក្សាលើករណីវៀតណាមចង់ពន្យាពេលស៊ីហ្គេមឆ្នាំ២០២១។ ប៉ុន្តែជាលទ្ធផលប្រទេសជាច្រើនមិនបានគាំទ្រនោះទេ ហើយវៀតណាមក៏បានដកឃ្លា និងលើកសំណើ ៣ ទៅរាជរដ្ឋាភិបាលរបស់ខ្លួន ទី១-រក្សាកាលបរិច្ឆេទប្រកួតកីឡាស៊ីហ្គេមនៅដដែលពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១ ទី២-សុំពន្យាពេលដល់ពាក់កណ្ដាលឆ្នាំ ឆ្នាំ២០២២ និងទី៣-សុំពន្យាពេលរយៈពេលដល់ឆ្នាំ២០២៥ ឬដល់ឆ្នាំ២០២៧ តែត្រូវមានការយល់ព្រមពីថៃ ឬប្រទេសព្រុយណេសិន។ ដោយឡែកពាក់ព័ន្ធនឹងស៊ីហ្គេមឆ្នាំ២០២៣ ដែលកម្ពុជាត្រូវដល់វេនធ្វើម្ចាស់ផ្ទះបន្ដពីវៀតណាមវិញ ត្រូវបានអង្គប្រជុំមានការព្រួយបារម្ភ ដ្បិតខ្លាចប៉ះពាល់ដល់ការត្រៀមខ្លួនរបស់កម្ពុជា។ ប៉ុន្តែបន្ទាប់ពីទទួលបានព័ត៌មាន និងរឿងរ៉ាវជាច្រើន គួបផ្សំជាមួយការតាំងចិត្តដ៏រឹងមាំរបស់កម្ពុជា បានធ្វើឲ្យប្រទេសទាំងនោះសប្បាយចិត្ត ហើយបានបង្ហាញនូវមោទនភាព ចំពោះប្រទេសកម្ពុជាដែលមានថ្នាក់ដឹកនាំរាជរដ្ឋាភិបាលគាំទ្រ និងជំរុញការងារផ្សេងៗ ធ្វើឲ្យការងារផ្សេងៗដំណើរការយ៉ាងរលូនទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
