អាជ្ញាធរជាតិអប្សរា បានកែសម្រួលផ្លូវ និងលូ តាមបណ្ដោយវិថីព្រះនរោត្ដមសីហមុនី អតីត​ផ្លូវ​កូម៉ៃ ក្នុងតំបន់អង្គរជាបណ្ដោះអាសន្ន ក្រោយទឹកហូរច្រោះដាច់ប្រវែងជាង៣ម៉ែត្រ ស្ថិតនៅ​ខាងត្បូង​កសិណអង្គរ កាលពីល្ងាចថ្ងៃទី១៦វិច្ឆិកាម្សិលមិញ។

លោក ឡៃ ប៉ូទី អនុប្រធាននាយកដ្ឋានទឹក ព្រៃឈើ នៃអាជ្ញាធរជាតិអប្សរា បាន​ឱ្យដឹ​ង​នៅថ្ងៃ​​ទី​១៧​ ខែ​វិច្ឆិកានេះថា ផ្លូវមួយខ្សែនេះ បានសាងសង់ឡើងតាំងពីសម័យបារាំង ដែលមកដល់​ពេល​នេះ មានអាយុកាលជាច្រើឆ្នាំមកហើយ ដែលធ្វើឱ្យលូទឹកចាស់ទ្រុឌទ្រោម ទើបធ្វើឱ្យ​ទឹក​ហូរ​ច្រោះ​ដីបណ្ដាលឱ្យដាច់ផ្លូវ ប្រវែងប្រមាណបីម៉ែត្រ។

លោកបានបញ្ជាក់ថា ក្រោយពីផ្លូវដាច់ភ្លាមៗ ក្រុមការងារអាជ្ញាធរជាតិអប្សរា បានទប់ស្កាត់មិនឱ្យ ទឹក​ហូរ​បន្ថែមទៀត ដើម្បីរក្សាទុកទឹកក្នុងបារាយណ៍ និងមិនឱ្យទឹកហូរសង្កត់ស្រូវប្រជាពលរដ្ឋ នៅ​ក្នុងបារាយណ៍ផង។

លោកបន្ដថា ក្រុមការងារកំពុងជួសជុលបណ្ដោះអាសន្ន ដោយចាក់ដីថ្មបំពេញកន្លែងបាក់ដាច់ ដើម្បី​ឱ្យ​ធ្វើចរាចរណ៍ឡើងវិញជាបណ្ដោះអាសន្ន ខណៈដែលផ្លូវនេះមាន​គម្រោង​ធ្វើ​ទ្វារ​ទឹក​ថ្មី​នា​ពេល​ខាង​មុខ។

សូមបញ្ជាក់ថា ផ្លូវកូម៉ៃ ត្រូវបានប្ដូរឈ្មោះ ជាវិថីព្រះនរោត្ដមសីហមុនី ក្នុងអំឡុងពេលការកសាង ហេដ្ឋា​រចនាសម្ព័ន្ធ​ផ្លូវថ្នល់ ៣៨ខ្សែក្នុងក្រុងសៀមរាបកន្លងមក។ វិថីនេះ តភ្ជាប់ពីវិថីស៊ីវុត្ថា ត្រង់​ចំណុច​ភ្លើងស្តុប អតីតពហុកីឡដ្ឋានខេត្ដសៀមរាប ក្រុងសៀមរាប ឆ្ពោះទៅ​ដល់​ចំណុច​កសិណទឹកអង្គរវត្ដពីខាងត្បូង ៕