នាយឧត្តមសេនីយ៍ ទៀ សីហា ឧបនាយករដ្ឋមន្រ្តីក្រសួងការពារជាតិកម្ពុជា បានថ្លែងថា កម្ពុជា​តែងតែ​ប្តេជ្ញាចិត្តក្នុងការធ្វើកិច្ចសហប្រតិបត្តិការ ប្រកប​ដោយ​ការ​ស្ថាបនា​ជាមួយ​ប្រជាជាតិ​ទាំង​អស់​ តាមរយៈក្របខ័ណ្ឌទ្វេភាគី តំបន់ និងអន្តរជាតិ ដើម្បីរួមចំណែកដល់សន្តិភាព សន្តិសុខ ស្ថិរភាព ការអភិវឌ្ឍប្រកបដោយចីរភាព និងវិបុលភាពពិភពលោក។

ការលើកឡើងរបស់ប្រមុខការពារជាតិកម្ពុជារូបនេះ គឺបានធ្វើឡើង​នៅ​ក្នុង​កិច្ច​ប្រជុំ​រដ្ឋមន្រ្តី​ការពារ​ជាតិ​អាស៊ាន-បូកលើកទី១០(10th ADMM-Plus) ឆ្នាំ២០២៣ ដែលប្រទេស​ឥណ្ឌូនេស៊ី​កំពុង​ធ្វើ​ជា​ម្ចាស់​ផ្ទះ។ កិច្ចប្រជុំនេះមានការចូលរួមពីរដ្ឋមន្រ្តីការពារជាតិអាស៊ាន និងរដ្ឋមន្ត្រី​ការពារ​ជាតិ​ប្រទេស​បូក​ចំនួន ៨មកពីប្រទេសចិន ជប៉ុន សាធារណរដ្ឋកូរ៉េ អូស្រ្តាលី ញូហ្សឺឡែន សហព័ន្ធ​រុស្សី ឥណ្ឌា និង សហរដ្ឋអាមេរិក។

នៅក្នុងកិច្ចប្រជុំនោះនាយឧត្តមសេនីយ៍ ទៀ សីហា បាន​បញ្ជាក់​បន្ថែម​ទៀត​ថា​កម្ពុជា​នៅ​តែ​បន្ត​ជំហរ​យ៉ាង​រឹងមាំចំពោះគោលការណ៍ នៃការគោរពអធិបតេយ្យភាព និងផលប្រយោជន៍រួម។ តែ​ទោះ​ជា​យ៉ាង​ណាក៏​ដោយកម្ពុជា ប្រឆាំងដាច់ខាត នឹងការប្រើកម្លាំងដើម្បីដោះស្រាយបញ្ហា និង​ការ​ចង​សម្ព័ន្ធ​ភាពដែលមានគោលបំណងបំផ្លាញគ្នាទៅវិញទៅមក។

នៅចំពោះ​មុខរដ្ឋមន្រ្តីការពារជាតិទាំងនោះ នាយឧត្តមសេនីយ៍ ទៀ សីហា បានសង្កត់ធ្ងន់ថា «ខណៈ​ពេល​ដែលសន្តិភាព និងសន្តិសុខរបស់យើងមានភាពប្រទាក់ក្រឡាគ្នា ការរក្សា​សន្តិភាព​ក្នុង​តំបន់​គួរ តែជាអាទិភាពចម្បងសម្រាប់យើងទាំងអស់គ្នា។ សន្តិភាព គឺជាមូលដ្ឋាន​គ្រឹះ​ដែល​មិន​អាច​ខ្វះបាន​សម្រាប់ការពង្រឹងតំបន់ប្រកបដោយនិរន្តរភាព និងវិបុលភាព។ ជាក់ស្ដែង​សមិទ្ធ​ផល​សំខាន់ៗ​របស់កម្ពុជា រួមមានការអភិវឌ្ឍសេដ្ឋកិច្ច-សង្គម ភាពរីកចម្រើន ស្ថិរភាពក្នុងប្រទេស និង​សណ្ដាប់ធ្នាប់សាធារណៈ សុទ្ធតែ​ជា​ផ្លែផ្កា​ នៃ​សន្តិភាព​យូរ​អង្វែង​ដែល​កើត​ចេញ​ពី​គោល​នយោបាយ ឈ្នះ ឈ្នះ របស់សម្តេចតេជោ ហ៊ុន សែន»។

យ៉ាង​ណាក៏ដោយនៅក្នុងកិច្ចប្រជុំខាងលើនេះដែរនាយឧត្តមសេនីយ៍ទៀ សីហា ក៏បាន​ថ្លែង​អំណរ​គុណ និងកោត​សរសើរ​យ៉ាង​ជ្រាល​ជ្រៅ​ចំពោះ​ការ​រួម​ចំណែក​ដ៏​ធំ​ធេង​របស់​រដ្ឋមន្ត្រីការពារ​ជាតិ​ទាំង​​អស់ ក្នុងការបង្កើនទំនុកចិត្តជាយុទ្ធសាស្ត្រ និងការកសាងអន្តរប្រតិបត្តិការ លើវិស័យ​ការពារ​ជាតិ របស់អាស៊ាន តាមរយៈវេទិកាកិច្ចប្រជុំរដ្ឋមន្ត្រីការពារជាតិអាស៊ានបូក និង​ក្រុម​ការ​ងារ​ជំនាញ​ផង​ដែរ៕ អត្ថបទ៖ បាន ចក់