តម្លៃទំនិញកំពុងកើនឡើងយ៉ាងខ្លាំងនៅតាមបណ្ដាហាងលក់គ្រឿងទេសនៅទូទាំងប្រទេសរុស្ស៊ី។ គ្រួសារនានាត្រូវកាត់បន្ថយការចំណាយ ខណៈពួកគេជួបប្រទះនឹងអតិផរណាខ្ពស់ដែលបង្កឡើងដោយសង្គ្រាមនៅអ៊ុយក្រែន និងទណ្ឌកម្មជាច្រើនដែលដាក់ដោយលោកខាងលិច។

អ្នកស្រុកម្នាក់បាននិយាយថា «ខ្ញុំមើលឃើញថារបស់របរបានឡើងថ្លៃយ៉ាងខ្លាំងក្នុងរយៈពេល ៥ឆ្នាំនេះ។ គ្រឿងទេសនានា ឡើងថ្លៃជាងពីរទៅបីដងឥឡូវនេះ ហើយអាហារសម្រាប់ទារកវិញឡើងថ្លៃដល់ទៅបួនដង»។

រូបិយប័ណ្ណរូប្លិ៍ របស់រុស្ស៊ី បានធ្លាក់ចុះធៀបនឹងប្រាក់ដុល្លារអាមេរិក ចាប់តាំងពីសង្រ្គាមបានចាប់ផ្តើមក្នុងខែកុម្ភៈ ឆ្នាំ២០២២ មក ដែលធ្វើឲ្យតម្លៃទំនិញនាំចូលកើនឡើង ហើយអ្វីៗទាំងអស់នេះកើតឡើងមុនការបោះឆ្នោតឆ្នាំ២០២៤ ដែលលោកប្រធានាធិបតី វ្ល៉ាឌីមៀ ពូទីន ត្រូវបានគេរំពឹងថា នឹងឈរឈ្មោះម្តងទៀត ក្នុងជំហានមួយដែលនឹងបន្តឱ្យលោកកាន់អំណាចរហូតដល់យ៉ាងហោចណាស់ឆ្នាំ២០៣០។

ស្ថិតិផ្លូវការបង្ហាញថា ប្រជាជនរុស្ស៊ីជាង ១៥លាននាក់ កំពុងរស់នៅក្រោមបន្ទាត់នៃភាពក្រីក្រ។ សេដ្ឋវិទូរុស្ស៊ីម្នាក់ឈ្មោះ Igor Lipits និយាយថា ស្ថានភាពកាន់តែអាក្រក់ជាងអ្វីដែលវិមានក្រឹមឡាំងរាយការណ៍ទៅទៀត។

លោកប៉ាន់ប្រមាណថា មនុស្សប្រហែល ២០លាននាក់ អាចស្ថិតក្នុង ឬជិតដល់ភាពក្រីក្រ ហើយអ្នកសេដ្ឋវិទូខ្លះគិតថា រូបិយប័ណ្ណរូប្លិ៍ អាចធ្លាក់ថ្លៃចុះថែមទៀតបន្ទាប់ពីការបោះឆ្នោត៕