នៅព្រឹកថ្ងៃទី១៧ ខែវិច្ឆិកា ឆ្នាំ២០២៣ អ្នកឧកញ៉ាបណ្ឌិត ទ្រី ភាព និងអ្នកឧកញ៉ា គៀន ស្រីនាង ឧត្តមភរិយា បានចាត់អោយលោក ឃៀង សុជីវ័ន្ត អគ្គនាយករងក្រុមហ៊ុន ទ្រី ភាព គ្រុបចុះ​ជួប​សំណេះ​សំណាលជាមួយកីឡាករចំណុះទូក និងគណៈកម្មការទូក ដែលមានឈ្មោះថា ទូក-ង ទ្រីភាព​សែនជ័យ បាមីតេជោ ដែលស្ថិតក្នុង ឃុំទឹកវិល ស្រុកស្អាង ខេត្តកណ្ដាល ដើម្បី​ជាការ​លើកទឹកចិត្តដល់កីឡាករក្នុងការហាត់សម មុននឹងចូលរួមប្រកួតនៅរាជធានីភ្នំពេញ ដើម្បី​អបអរ​សាទរ​ព្រះរាជពិធីបុណ្យអំទូក បណ្ដែតប្រទីប សំពះព្រះខែ និងអកអំបុក នាថ្ងៃទី២៦ ២៧ និង២៨ ខែវិច្ឆិកា ខាងមុខនេះ។

ក្នុងឱកាសចុះមកជួបសំណេះសំណាលជាមួយកីឡាករចំណុះទូក និងគណៈកម្មការទូក លោក ឃៀង សុជីវ័ន្ត តំណាងអ្នកឧកញ៉ា ទ្រី ភាព បាននាំយកថវិកា ២០លានរៀល សម្រាប់​ផ្គត់​ផ្គង់​លើ​ការ​ចំណាយ​ផ្សេងៗ ពេលហាត់សមទូក និងត្រៀមសម្រាប់ការធ្វើដំណើរទៅចូលរួមប្រកួត ព្រម​ទាំង អង្ករចំនួន ៥តោន, មីជាតិ ១០០កេស, ត្រីខ ១០០ យួរ ព្រមទាំងទឹកសុទ្ធជាច្រើនរយកេស និង​សម្លៀកបំពាក់សម្រាប់ការហាត់សម និងចូលរួមប្រកួត។

ដើម្បីឆ្លើយតបចំពោះការគិតគូរ និងយកចិត្តទុកដាក់ពី អ្នកឧកញ៉ា និងលោកជំទាវ អ្នកឧកញ៉ា គៀន ស្រីនាង ក្នុងឱកាសនេះដែរ កីឡាករចំណុះទូក និងគណៈកម្មការទូក បានប្ដេជ្ញា​ចិត្ត​ខ្ពស់​ក្នុង​ការ​ចូលរួមប្រកួត ដើម្បីដណ្ដើមជ័យជំនះសម្រាប់អ្នកឃុំទឹកវិល ស្រុកស្អាង ខេត្តកណ្ដាល ម្យ៉ាង​ដើម្បីលើកមុខមាត់ភូមិស្រុកផង ព្រោះចាប់តាំងពីឆ្នាំ២០០៨ មក ទូក-ង ទ្រីភាពសែនជ័យ បាមី​តេជោ ដែលស្ថិតក្នុងវត្តសូរភី នេះ ប្រកួត បានចំនួន ១៧ដង ចាញ់៤ដង ឈ្នះ ១៣ដង៕