មេបញ្ជាការជាន់ខ្ពស់នៃកងកម្លាំងQudsរបស់អ៊ីរ៉ង់ បាននិយាយថា រណសិរ្សតស៊ូគាំទ្រក្រុមសកម្មប្រយុទ្ធហាម៉ាស ដែលគាំទ្រដោយទីក្រុងតេអេរ៉ង់ក្នុងសង្គ្រាមរបស់ខ្លួនជាមួយអ៊ីស្រាអែល នៅតំបន់ហ្កាហ្សា។

ទីភ្នាក់ងារសារព័ត៌មាន Tasnim ពាក់កណ្តាលផ្លូវការ បានរាយការណ៍ថា លោក Esmail Qaani បាននិយាយនៅក្នុងសារមួយទៅកាន់មេបញ្ជាការនៃក្រុមគាំទ្រដោយទីក្រុងតេអេរ៉ង់ កាលពីថ្ងៃព្រហស្បតិ៍ថា៖  «បងប្អូនរបស់អ្នកនៅក្នុងអ័ក្សនៃការតស៊ូ ឈររួបរួមជាមួយអ្នកទាំងអស់គ្នា។ ការតស៊ូនេះ នឹងមិនអនុញ្ញាតឲ្យសត្រូវសម្រេចបាននូវគោលដៅកខ្វក់របស់ខ្លួន នៅតំបន់ហ្កាហ្សា និងប៉ាឡេស្ទីនឡើយ។

ប្រទេសអ៊ីរ៉ង់ ដែលនិយាយសំដៅលើក្រុមប្រដាប់អាវុធដែលជាសម្ព័ន្ធមិត្តរបស់ខ្លួន នៅជុំវិញមជ្ឈិមបូព៌ាថា ជាផ្នែកមួយនៃ«អ័ក្សតស៊ូ» បានព្រមានអ៊ីស្រាអែលអំពីការកើនឡើង ប្រសិនបើខ្លួនបរាជ័យក្នុងការបញ្ចប់ការឈ្លានពាននៅតំបន់ហ្កាហ្សាស្ទ្រីប។

កងកម្លាំង Quds គឺជាដៃរបស់កងឆ្មាំបដិវត្តន៍ដ៏មានឥទ្ធិពលរបស់អ៊ីរ៉ង់ (IRGC) ដែលគ្រប់គ្រងកងជីវពលសម្ព័ន្ធមិត្តរបស់ខ្លួន នៅក្នុងតំបន់ ចាប់ពីលីបង់ អ៊ីរ៉ាក់ និងយេម៉ែន ដល់ប្រទេសស៊ីរី។

ភាពតានតឹងនៅក្នុងតំបន់ បានផ្ទុះឡើង ចាប់តាំងពីការវាយប្រហារដ៏សាហាវដោយក្រុមសកម្មប្រយុទ្ធហាម៉ាសដែលបានផ្ទុះឡើងតាមព្រំដែនពីហ្កាហ្សាចូលទៅក្នុងប្រទេសអ៊ីស្រាអែលកាលពីថ្ងៃទី៧ ខែតុលាដោយបានសម្លាប់មនុស្សប្រហែល ១.២០០នាក់ និងចាប់ចំណាប់ថ្នូរប្រហែល ២៤០នាក់ ក្នុងនោះមាន កុមារផងដែរ នេះបើយោងតាមចំនួនសរុបរបស់អ៊ីស្រាអែល។