អ៊ីស្រាអែល៖ នគរបាល​អ៊ីស្រាអែល​បាន​ប្រើប្រាស់​គ្រាប់​បែកផ្សែង និង​ការ​ណុង​បាញ់​ទឹក​ដើម្បី​បំបែក​ក្រុម​អ្នក​តវ៉ា​ប៉ា​ឡេ​ស្ទី​ន ដែល​មាន​កំហឹង​ចំពោះ​វត្តមាន​របស់​អ្នកនយោបាយ​ជន​ជាតិ​ជ្វី​ហ្វ​ជ្រុលនិយម នៅ​ច្រក​ទ្វា​ក្រុង​ដា​ម៉ាស់​រដ្ឋធានី​ហ្សេ​រុយ​ហ្សា​ឡឹម​។

​ក្រុម​អ្នកគាំទ្រ​របស់​អ្នកនយោបាយ​ជនជាតិ​ជ្វី​ហ្វបាន​គ្រវី​ទង់​ជាតិ​អ៊ីស្រាអែល និង​បាន​ប្រឈមមុខ​ជាមួយ​យុវជន​ដែល​កំពុង​គ្រវី​ទង់​ជាតិ​ប៉ា​ឡេ​ស្ទី​ន​។ ក្រុម​អ្នក​តវ៉ា​ជាច្រើន​នាក់​ត្រូវ​បាន​គេ​ឃើញ​វាយ​ខ្នោះ និង​នាំ​ខ្លួន​ចេញ​ដោយ​នគរបាល​។ នគរបាល​អ៊ីស្រាអែល​បាន​ច្រានចោល​សំណើ​ធ្វើឡើង​ដោយ​លោក Ben Gvir ដើម្បី​ចូល​មក​ទីតាំង​ពិសិដ្ឋ​ដែល​ត្រូវ​បាន​ស្គាល់​ដោយ​ជនជាតិ​ជ្វី​ហ្វ​ជា Temple Mount ហើយ​សម្រាប់​ប្រជាជន​មូស្លីម​ត្រូវ​បាន​ស្គាល់​ថា​ជា Haram al Sharif ដែល​បង្ក​ការ​ព្រួយ​បារម្ភ​ថា​ វា​នឹង​មាន​ការ​ប៉ះ​ទង្គិច​គ្នា​ក្នុង​ទីក្រុង​។ ​ក្នុង​រយៈពេល​ប៉ុន្មាន​សប្ដាហ៍​ថ្មីៗ​នេះភាព​តានតឹង​បាន​ផ្ទុះឡើង ​ជុំវិញ​ការ​បណ្ដេញ​ចេញ​ក្រុម​គ្រួសារ​ប៉ា​ឡេ​ស្ទី​ន​ក្នុង​តំបន់ Sheikh Jarrah ទីក្រុង​ហ្សេ​រុយ​ហ្សា​ឡឹម​ខាងកើត ដែល​អាជ្ញាធរ​អ៊ីស្រាអែល​បាន​រា​រាំង​ដំណើរ​ការ​ចូល​ទៅកាន់​ក្រុង​ដា​ម៉ាស់ អំឡុង​ពិធីបុណ្យ​រ៉ា​ម៉ា​ដាន​។

ភាព​តានតឹង​បាន​រាលដាល​ពី​ទីក្រុង​ហ្សេ​រុយ​ហ្សា​ឡឹមទៅដល់​តំបន់​ហ្គា​ហ្សា ដែល​បាន​នាំ​ទៅ​រក​សង្គ្រាម​រយៈពេល ​១១​ថ្ងៃ​រវាង​ប្រទេស​អ៊ីស្រាអែល និង​ក្រុម​ហា​ម៉ាស់​។​ លោក Ben Gvir គឺជា​ប្រធាន​គណបក្ស​អំណាច​ជនជាតិ​ជ្វី​ហ្វ​ស្ដាំនិយម ដែល​បាន​ញុះញង់​ឲ្យ​មាន​អំពើ​ហិង្សា​ប្រឆាំង​អារ៉ាប់ ដែល​បាន​អំពាវនាវ​ឲ្យ​អ៊ីស្រាអែល​ត្រូវ​បាន​គ្រប់គ្រង ​ដោយ​ច្បាប់​សាសនា​ជ្វី​ហ្វ និង​បាន​គាំទ្រ​ការ​បណ្ដេញ​ចេញ​ជនជាតិ​អារ៉ាប់ និង​អ្នក​មិនមែន​ជនជាតិ​ជ្វី​ហ្វ​ផ្សេងទៀត​ពី​ប្រទេស​អ៊ីស្រាអែល និង​ដែនដី​ដែល​បាន​កាន់កាប់​៕

អត្ថបទ៖ ប៊ុនថន