យោធាអ៊ីស្រាអែល និយាយថា មនុស្ស២៣៩នាក់ ត្រូវក្រុមហាម៉ាស ចាប់ជាចំណាប់ថ្នូរ។ ចំណាប់ថ្នូរ៤នាក់ ត្រូវបានដោះលែង ហើយម្នាក់ទៀត ត្រូវបានដោះលែងដោយកងកម្លាំងអ៊ីស្រាអែល។ លោក Ori Megidish ដែលជាទាហានអ៊ីស្រាអែល ត្រូវបានដោះលែងក្នុងអំឡុងពេលប្រតិបត្តិការថ្នើរជើង នៅតំបន់ហ្កាហ្សា នៅថ្ងៃទី២៩ ខែតុលា។ ស្ត្រីពីរនាក់គឺ Nurit Cooper និង Yocheved Lifschitz ត្រូវបានដោះលែង នៅថ្ងៃចន្ទ២៤ ខែតុលា។ នៅថ្ងៃសុក្រ ទី២០ ខែតុលា ចំណាប់ថ្នូរអាមេរិកពីរនាក់ ម្តាយ និងកូនស្រី ត្រូវបានដោះលែងផងដែរ។

ឥឡូវនេះ អ៊ីស្រាអែលនិយាយថា សាកសពរបស់ចំណាប់ថ្នូរពីរនាក់ គឺ Noa Marciano និង Yehudit Weiss ត្រូវបានគេរកឃើញ នៅជិតមន្ទីរពេទ្យ Al-Shifa ក្នុងតំបន់ហ្កាហ្សា។

ក្រុមហាម៉ាស និយាយថា ខ្លួនបានលាក់ចំណាប់ថ្នូរនៅក្នុង «កន្លែងសុវត្ថិភាព និងផ្លូវរូងក្រោមដី» ក្នុងតំបន់ហ្កាហ្សា។ កងកម្លាំងការពារអ៊ីស្រាអែល (IDF) បាននិយាយកាលពីមុនថា ចំណាប់ថ្នូររួមមានកុមារ ២០ នាក់ និងមានអាយុចន្លោះពី ១០ ទៅ ២០ ឆ្នាំ និងជាង ៦០ឆ្នាំ។

កងកម្លាំងការពារអ៊ីស្រាអែល បានជូនដំណឹងដល់គ្រួសារមួយចំនួនថា មនុស្សជាទីស្រលាញ់របស់ពួកគេកំពុងត្រូវបានចាប់ធ្វើជាចំណាប់ថ្នូរ ខណៈដែលគ្រួសារផ្សេងទៀត សាច់ញាតិរបស់ពួកគេ នៅតែមិនទាន់បានរាប់បញ្ចូលក្នុងបញ្ចី ជឿថា ពួកគេត្រូវបានចាប់ខ្លួន។