គេឃើញអ្នករងរបួសជាច្រើននាក់ត្រូវបានបញ្ជូនទៅកាន់មន្ទីរពេទ្យ Nasser ក្នុងទីក្រុង Khan Younis នៅថ្ងៃសុក្រ (ទី១៧ ខែវិច្ឆិកា) នេះ បន្ទាប់ពីមានការវាយប្រហាររបស់អ៊ីស្រាអែល នៅក្នុងតំបន់លំនៅឋានមួយ នៅភាគខាងត្បូងនៃតំបន់ហ្កាហ្សា។

សូមបញ្ជាក់ថា បើតាមអាជ្ញាធរសុខាភិបាលតំបន់ហ្គាហ្សា ដែលអង្គការសហប្រជាជាតិ ឬUN បានចាត់ទុកថា អាចជឿទុកចិត្តបាននោះ បានឲ្យដឹងថា យ៉ាងហោចណាស់មនុស្ស ១១.៥០០នាក់ ត្រូវបានបញ្ជាក់ថាត្រូវបានសម្លាប់ នៅក្នុងការទម្លាក់គ្រាប់បែក និងការវាយលុកដោយថ្មើរជើងរបស់អ៊ីស្រាអែល ដោយក្នុងចំណោមនោះច្រើនជាង ៤.៧០០នាក់ ជាកុមារ។

អង្គការឃ្លាំមើលសិទ្ធិមនុស្ស បាននិយាយថា មន្ទីរពេទ្យមានការការពារពិសេស នៅក្រោមច្បាប់មនុស្សធម៌អន្តរជាតិ ហើយនាយកអង្គការឃ្លាំមើលអង្គការសហប្រជាជាតិ លោក Louis Charbonneau បាននិយាយថា៖ «មន្ទីរពេទ្យបាត់បង់ការការពារទាំងនោះ លុះត្រាណាតែវាអាចត្រូវបានបង្ហាញថា អំពើបង្កគ្រោះថ្នាក់ ត្រូវបានធ្វើឡើងពីបរិវេណកន្លែងនោះ»។

ការកើនឡើងនូវចំនួនអ្នកស្លាប់ នៅតំបន់វ៉េសប៊ែង បាននាំឲ្យមានការភ័យខ្លាចថា ទឹកដី ដែលអ៊ីស្រាអែលដណ្ដើមបានក្នុងសង្គ្រាមឆ្នាំ១៩៦៧ អាចកាន់តែធ្ងន់ធ្ងរទៅៗហួសពីការគ្រប់គ្រងបាន ក្នុងពេលមានជម្លោះនៅតំបន់ហ្កាហ្សា។ គិតចាប់តាំងពីមានការវាយប្រហាររបស់ពួកហាម៉ាស កាលពីថ្ងៃទី៧ ខែតុលាមកលើប្រទេសអ៊ីស្រាអែល យ៉ាងហោចណាស់ជនជាតិប៉ាឡេស្ទីនចំនួន ១៧៨នាក់ហើយ ត្រូវបានសម្លាប់ នៅតំបន់វ៉េសប៊ែងនេះ៕