បន្ទាប់ពីមានតែមន្ទីរពេទ្យព្យាបាលជំងឺមហារីកតែ១គត់ ក្នុងតំបន់ហ្កាហ្សាស្រ្ទីបត្រូវបិទទ្វារ ស្របពេលអ៊ីស្រាអែលនៅតែបន្ដទម្លាក់គ្រាប់បែកលើតំបន់ហ៊ុមព័ទ្ធមួយនេះ អ្នកជំងឺដែលបាត់បង់ទីជម្រក ត្រូវបានជម្លៀសទៅកាន់មន្ទីរពេទ្យមួយផ្សេងទៀត ក្នុងក្រុងខានយូនីស (Khan Younis)។

នាយកមន្ទីរពេទ្យមិត្ដភាពទួរគី-ប៉ាឡេស្ទីន វេជ្ជបណ្ឌិត សូប៊ី ស្កេក (Sobhi Skeik) បាននិយាយថា ការធ្វើដំណើរចេញក្រៅមន្ទីរពេទ្យទៅក្រុងខាន យូនីស គឺគ្រោះថ្នាក់ណាស់ ដោយបន្ថែមថា មានអ្នកជំងឺមហារីក៤នាក់ហើយបានស្លាប់តាមផ្លូវ។

វេជ្ជបណ្ឌិតស្កេក បាននិយាយថា ស្ថានភាពកាន់តែអាក្រក់ខ្លាំងឡើងនៅក្នុងតំបន់ហ្កាហ្សា។ ពោលគឺជាស្ថានភាពគ្រោះមហន្ដរាយ ដែលចាំបាច់ត្រូវតែអំពាវនាវទៅកាន់សហគមន៍អន្ដរជាតិ ឲ្យមកជួយសង្រ្គោះតំបន់ហ្កាហ្សា ហើយយើងត្រូវការអ្នកមកចាត់វិធានការឲ្យមានបទឈប់បាញ់ក្នុងតំបន់ហ្កាហ្សា

ជាបន្ទាន់ ដើម្បីបញ្ឈប់ការសម្លាប់មនុស្សក្នុងតំបន់ហ្កាហ្សា និងបញ្ឈប់ការសម្លាប់អ្នកជំងឺរបស់យើង ក៍ដូចជាបញ្ឈប់ការសម្លាប់អ្នកជំងឺមហារីករបស់យើងផងដែរ។

អ្នកជំងឺមួយចំនួនត្រូវបានជម្លៀសចេញពីមន្ទីរពេទ្យមហារីក ដោយជម្លៀសទៅក្រុងអង់ការ៉ា(Ankara) ដែលក្នុងនោះអ្នកជំងឺ២៧នាក់ បានទៅដល់រដ្ឋធានីទួរគីភ្លាមៗបន្ទាប់ពីបានចាកចេញនៅពាក់កណ្ដាលអធ្រាត្រនៅថ្ងៃព្រហស្បតិ៍ ដោយចេញពីប្រទេសអេហ្ស៊ីប បន្ទាប់ពីចាកចេញពីតំបន់ហ្កហ្សា ដោយឆ្លងកាត់ច្រកទ្វារព្រំដែន រ៉ាហ្វា (Rafa)។

អ្នកជំងឺមហារីក ត្រូវបានទទួលការព្យាបាលពិសេសនៅឯមន្ទីរពេត្យមួយក្នុងតំបន់ហ្កាហ្សា ដែលបានបង្កើតឡើងដោយមានការគាំទ្រពីប្រទេសទួរគី។