ទូរទស្សន៍រដ្ឋកូរ៉េខាងជើង KRT នៅថ្ងៃសុក្រ (ទី១៧ ខែវិច្ឆិកា) នេះ បានរាយការណ៍ថា រដ្ឋមន្ត្រីធនធានធម្មជាតិរបស់រុស្ស៊ី លោក Alexander Kozlov បានជួបជាមួយនាយករដ្ឋមន្ត្រីកូរ៉េខាងជើង លោក Kim Tok Hun មុនពេលចាកចេញពីទីក្រុងព្យុងយ៉ាង។

ប្រព័ន្ធផ្សព្វផ្សាយរដ្ឋ KCNA បានធ្វើសេចក្ដីរាយការណ៍ថា ជំនួបនេះបានកើតឡើង កាលពីថ្ងៃព្រហស្បតិ៍ (ទី១៦ ខែវិច្ឆិកា) ក្នុងបរិយាកាសប្រកបដោយមិត្តភាពជាមួយនឹងវត្តមាននៃមន្ត្រីជាន់ខ្ពស់ផ្សេងទៀតរបស់ភាគីទាំង២ ក្នុងនោះរួមទាំងរដ្ឋមន្ត្រីកីឡារុស្ស៊ី លោក Oleg Matytsin និងរដ្ឋមន្ត្រីទំនាក់ទំនងសេដ្ឋកិច្ចក្រៅប្រទេសរបស់កូរ៉េខាងជើងលោក Yun Jong Ho។

បើយោងតាម KCNA ដដែលនេះ បានឲ្យដឹងថា គណៈប្រតិភូរុស្ស៊ីដឹកនាំដោយលោក Kozlov បានទៅដល់កូរ៉េខាងជើង កាលពីថ្ងៃអង្គារ (ទី១៤ វិច្ឆិកា) ហើយបានទៅទស្សនាកន្លែងជាច្រើនក្នុងរដ្ឋធានីរបស់កូរ៉េខាងជើង ក្នុងនោះរួមទាំងការតាំងពិព័រណ៍ផលិតផលឧស្សាហកម្មធុនស្រាល មុនពេលចាកចេញទៅកាន់ប្រទេសរុស្ស៊ី នៅថ្ងៃព្រហស្បតិ៍នោះ។

សូមបញ្ជាក់ថា ទីក្រុងម៉ូស្គូ និងក្រុងព្យុងយ៉ាងបាននិងកំពុងបង្កើនកិច្ចសហប្រតិបត្តិការបន្ទាប់ពីមានកិច្ចប្រជុំកំពូលរបស់មេដឹកនាំនៃភាគីទាំង២ កាលពីខែកញ្ញា។ កូរ៉េខាងជើង និងរុស្ស៊ីបានបដិសេធថា មិនមានកិច្ចព្រមព្រៀងសព្វាវុធអ្វីទាំងអស់ បើទោះបីជាទីក្រុងវ៉ាស៊ីនតោនបានចោទប្រកាន់ក្រុងព្យុងយ៉ាងថា បានផ្គត់ផ្គង់សម្ភារៈយោធាដល់រុស្ស៊ី ដើម្បីយកទៅប្រើប្រាស់ក្នុងសង្គ្រាមជាមួយអ៊ុយក្រែន ហើយទីក្រុងម៉ូស្គូបានផ្តល់ជំនួយបច្ចេកទេសយោធាដល់កូរ៉េខាងជើងវិញក៏ដោយ៕