នៅថ្ងៃសុក្រនេះ យានចុះទឹកចុះពីលើនាវាចម្បាំង ត្រូវបានគេមើលឃើញចុះចតនៅលើកោះ Tokunoshima ស្របពេលដែលសមយុទ្ធយោធាទូទាំងប្រទេសរយៈពេល ១១ថ្ងៃ បានកំពុងធ្វើឡើងនៅក្នុងប្រទេសជប៉ុន ដើម្បីត្រៀមកងកម្លាំងជើងគោក ជើងទឹក និងជើងអាកាស សម្រាប់ជម្លោះដ៏មានសក្តានុពលនៅក្នុងតំបន់អាស៊ីខាងកើត ។ 

 នាវាប្រើកម្លាំងខ្យល់ Hovercraft បានបញ្ជូនយានចុះទឹកវាយប្រហារទៅកាន់កោះ Tokunoshima ស្ថិតនៅតំបន់ភាគនិរតីប្រទេសជប៉ុន អំឡុងសមយុទ្ធយោធានេះ មុនសមយុទ្ធចុះចតនាវាម៉ារីនមួយទៀត ដែលបានកំណត់រៀបចំឡើងនៅចុងសប្តាហ៍នេះ ។ 

 សមយុទ្ធដែលនឹងបញ្ចប់នៅថ្ងៃចន្ទ ទី ២០ ខែវិច្ឆិកាខាងមុខនេះ រួមបញ្ចូលផងដែរសមយុទ្ធការពារដែនអាកាសនៅតំបន់ភាគខាងជើងប្រទេសជប៉ុន និងវាយប្រហារក្លែងក្លាយលើម៉ាស៊ីនរ៉េអាក់ទ័រនុយក្លេអ៊ែរ ៥គ្រឿង ដែលរួមទាំងរោងចក្រ Fukushima ។ 

 សមយុទ្ធយោធាបែបនេះ ត្រូវបានរៀបចំឡើងដើម្បីពង្រីកទាំងវិសាលភាព និងទាំងញឹកញាប់ជាងមុន ក្រោយកាលពីខែធ្នូ នាយករដ្ឋមន្រ្តីជប៉ុនលោក Fumio Kishida បានបង្ហាញការពង្រឹងវិស័យយោធាដែលនឹងបង្កើនការចំណាយការពារជាតិទ្វេដងសម្រាប់រយៈពេល ៥ឆ្នាំក្រោយ ៕