នៅក្នុងបទសម្ភាសន៍មួយដែលត្រូវបានចេញផ្សាយ នៅថ្ងៃសុក្រ (ទី១៧ ខែវិច្ឆិកា) នេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោកសង្ឃឹមថា ប្រធានាធិបតីលោក វ្ល៉ាឌីមៀរ ពូទីន នឹងឈរឈ្មោះក្នុងការបោះឆ្នោតខែមីនា ដើម្បីប្រជែងតំណែងប្រធានាធិបតីរុស្ស៊ីមួយអាណត្តិទៀត ជាការប៉ុនប៉ងដែលនឹងធ្វើឲ្យលោក ពូទីន កាន់អំណាច រហូតដល់យ៉ាងហោចណាស់ឆ្នាំ២០៣០។

លោក ពូទីន ដែលត្រូវបានប្រគល់តំណែងជាប្រធានាធិបតីដោយលោក Boris Yeltsin នៅថ្ងៃចុងក្រោយនៃឆ្នាំ១៩៩៩ បានកាន់អំណាចយូរជាងមេដឹកនាំវិមានក្រឹមឡាំងដទៃទៀត គិតចាប់តាំងពីលោក Josef Stalin ដោយថែមទាំងយូរជាងការកាន់អំណាចរយៈពេល ១៨ឆ្នាំរបស់លោក Leonid Brezhnev ទៀតផង។ លោក ពូទីន ឈានចូលវ័យ ៧១ឆ្នាំ កាលពីថ្ងៃទី៧ ខែតុលា។

ដោយត្រូវបានសួរដោយប៉ុស្តិ៍ទូរទស្សន៍និស្សិតរបស់វិទ្យាស្ថានរដ្ឋម៉ូស្គូ សម្រាប់ទំនាក់ទំនងអន្តរជាតិ (MGIMO) ថា តើប្រធានាធិបតីបន្ទាប់បន្ទាប់ពីលោក ពូទីន គួរតែមានមុខមាត់យ៉ាងណានោះ លោក Peskov បានឆ្លើយថា «គ្មានអ្វីប្រែប្រួលទេ»។

លោក Peskov បានប្រាប់ទូរទស្សន៍ MGIMO 360 ដោយញញឹមថា៖ «ឬបើមិនដូច្នោះទេអាចផ្លាស់ប្ដូរ តែយ៉ាងណាគ្មានអ្វីប្រែប្រួលទេ។ លោក ពូទីន មិនទាន់បានប្រកាសពីចេតនារបស់លោក ក្នុងការឈរឈ្មោះនោះទេ តែខ្ញុំចង់ឲ្យជឿជាក់យ៉ាងពិតប្រាកដថា លោកនឹងធ្វើដូច្នេះ ហើយខ្ញុំមិនមានមន្ទិលសង្ស័យទេថា លោកនឹងឈ្នះការបោះឆ្នោត។ ខ្ញុំមិនមានអ្វីងឿងឆ្ងល់នោះទេថា លោកនឹងបន្តធ្វើជាប្រធានាធិបតីទៀត»។

កាលពីដើមខែនេះ ទីភ្នាក់ងារសារព័ត៌មាន Reuters បានរាយការណ៍ថា លោកពូទីនបានសម្រេចចិត្តឈរឈ្មោះក្នុងការបោះឆ្នោតខែមីនា ខណៈដែលរូបលោកមានអារម្មណ៍ថា លោកត្រូវតែដឹកនាំប្រទេសរុស្ស៊ីឆ្លងកាត់រយៈពេលដ៏គ្រោះថ្នាក់បំផុត ក្នុងរយៈពេលជាច្រើនទសវត្សរ៍មកនេះ៕