ការដើរហែក្បួន ដែលអំពាវនាវឲ្យមានការដោះលែងចំណាប់ថ្នូរទាំងអស់ ដែលត្រូវបានឃុំខ្លួនដោយពួកសកម្មប្រយុទ្ធប៉ាឡេស្ទីន នៅតំបន់ហ្កាហ្សា បានធ្វើដំណើរឆ្ពោះទៅក្រុងហ្សេរុយសាឡិម នៅថ្ងៃសុក្រ (ទី១៧ វិច្ឆិកា) ដោយមានសាច់ញាតិ មិត្តភក្តិ និងអ្នកគាំទ្ររាប់ពាន់នាក់ចូលរួមក្នុងក្បួននេះ។

នៅរយៈពេលមួយនៃការហែក្បួននោះ លោក Steffen Seibert ឯកអគ្គរដ្ឋទូតអាល្លឺម៉ង់ប្រចាំប្រទេសអ៊ីស្រាអែល បានប្រកាសថា «យើងនៅជាមួយអ្នក»។

ថ្ងៃសុក្រនេះ គឺមានរយៈពេល ៤២ថ្ងៃហើយ គិតចាប់តាំងពីជនជាតិអ៊ីស្រាអែល និងជនបរទេសប្រហែល ២៤០នាក់ ត្រូវបានចាប់ខ្លួនពីអ៊ីស្រាអែលនាំយកទៅតំបន់ហ្កាហ្សា ក្នុងអំឡុងពេលមានការវាយលុករបស់ក្រុមហាម៉ាស កាលពីថ្ងៃទី៧ ខែតុលាលើសហគមន៍នានារបស់អ៊ីស្រាអែល។

រូបភាពវីដេអូពីយានដ្រូន ដែលថតដោយទីភ្នាក់ងារសារព័ត៌មាន Reuters បានបង្ហាញពីមនុស្សរាប់ពាន់នាក់ដើរដង្ហែក្បួន នៅលើផ្លូវហាយវេតភ្ជាប់ទីក្រុងតែលអាវីវ និងទីក្រុងហ្សេរុយសាឡិម ដោយបិទផ្លូវធ្វើចរាចរជាច្រើនខ្សែ ដើម្បីឲ្យការហែក្បួនធ្វើដំណើរទៅមុខ សម្រាប់ថ្ងៃទី៤ នៃការដើរតវ៉ានេះ៕