ប្រធានាធិបតីហ្វីលីពីនបាននិយាយថា លោកនឹងជួបជាមួយសមភាគីចិន នៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ឬ APEC ដោយលោក Ferdinand Marcos Jr. បានប្រាប់ថា លោកសង្ឃឹមថា ជំនួបជាមួយប្រធានាធិបតីចិន លោក Xi Jinping នឹងជួយបន្ធូរបន្ថយភាពតានតឹង ជុំវិញជម្លោះនៅសមុទ្រចិនខាងត្បូង។

លោក Marcos បានលើកឡើងអំពីសន្និសីទដែលបានគ្រោងទុកនៅក្នុងសារជាវីដេអូមួយ នៅថ្ងៃសុក្រ (ទី១៧ ខែវិច្ឆិកា) នេះ ដោយលោកបាននិយាយថា៖ «ខ្ញុំនឹងទទួលយកទស្សនៈរបស់ប្រធានាធិបតីចិនអំពីអ្វីដែលយើងអាចធ្វើ ដើម្បីកាត់បន្ថយកម្ដៅ ពោលគឺដើម្បីកុំឲ្យស្ថានការណ៍នៅសមុទ្រហ្វីលីពីនខាងលិច មានសភាពកាន់តែធ្ងន់ធ្ងរឡើងៗ»។ ជាមួយគ្នានេះ លោកក៏បាននិយាយដែរថា លោកមានបំណងបង្កើតយុទ្ធសាស្ត្រសម្រាប់តួនាទីរបស់ហ្វីលីពីន នៅសមុទ្រចិនខាងត្បូង បន្ទាប់ពីកិច្ចពិភាក្សានោះ។

សូមបញ្ជាក់ថា ការកើតមាននូវឧប្បត្តិហេតុជាបន្តបន្ទាប់ ក្នុងដែនទឹក នៅរយៈពេលប៉ុន្មានខែកន្លងមកនេះ បានបង្កើនភាពតានតឹង រវាងទីក្រុងម៉ានីល និងទីក្រុងប៉េកាំង។ ហេតុការណ៍ទាំងនោះ មានដូចជានាវាឆ្មាំល្បាតឆ្នេរសមុទ្រចិន បុកជាមួយទូកផ្គត់ផ្គង់សម្ភារយោធាហ្វីលីពីន កាលពីខែតុលា ហើយនាវារបស់ចិនបានប្រើកាណុងបាញ់ទឹកដាក់នាវាហ្វីលីពីន ក្នុងខែសីហា និងដើមខែនេះ៕