ក្រុមមន្ត្រី បាននិយាយកាលពីថ្ងៃសុក្រ ទី១៧ ខែ វិច្ឆិកាថា ប្រទេសហ្វាំងឡង់ នឹងដំឡើងរបាំងការពារនៅច្រកឆ្លងកាត់ចំនួនបួនកន្លែងនៅតាមព្រំដែនរបស់ខ្លួនជាមួយប្រទេសរុស្ស៊ី ចាប់ពីពាក់កណ្តាលអធ្រាត្រថ្ងៃសុក្រ ក្នុងគោលបំណងដើម្បីទប់ស្កាត់ការកើនឡើងជនអន្តោប្រវេសន៍ដែលទីក្រុង Helsinki ដោយបាននិយាយថា ត្រូវបានរៀបចំឡើងដោយទីក្រុងមូស្គូ។

ប្រទេសហ្វាំងឡង់ បានចោទប្រកាន់អាជ្ញាធររុស្សី ពីបទប្រមូលផ្តុំជនអន្តោប្រវេសន៍ ទៅកាន់ច្រកឆ្លងកាត់ព្រំដែន ជាការសងសឹកចំពោះការសម្រេចចិត្តរបស់ប្រទេសហ្វាំងឡង់ក្នុងការបង្កើនកិច្ចសហប្រតិបត្តិការការពារជាតិជាមួយសហរដ្ឋអាមេរិក ដែលការអះអាងនេះត្រូវបានវិមានក្រឹមឡាំងច្រានចោល។

ឆ្មាំព្រំដែនប្រទេសហ្វាំងឡង់ បាននិយាយថា របាំងការពារនឹងដំឡើងនៅច្រកឆ្លងកាត់ចំនួនបួនកន្លែងក្នុងចំណោម៩កន្លែង ជាមួយប្រទេសរុស្ស៊ីនៅភាគអាគ្នេយ៍របស់ប្រទេសខ្លួន។

យោងតាមឆ្មាំព្រំដែនបានឲ្យដឹងថា អ្នកស្វែងរកសិទ្ធិជ្រកកោនប្រមាណ ៣០០នាក់ ភាគច្រើនមកពីប្រទេសអ៊ីរ៉ាក់ យ៉េម៉ែន សូម៉ាលី និងស៊ីរី បានមកដល់ប្រទេសហ្វាំងឡង់ក្នុងសប្តាហ៍នេះ។

ក្រុមមន្ត្រីបាននិយាយថា មនុស្សជិត ១០០នាក់ បានចូលមកក្នុងប្រទេសហ្វាំងឡង់ ពីប្រទេសរុស្ស៊ី កាលពីពេលថ្ងៃត្រង់ ថ្ងៃសុក្រតែមួយថ្ងៃ។ ប្រទេសហ្វាំងឡង់មានព្រំដែនរួមប្រវែង ១.៣៤០ គីឡូម៉ែត្រ ជាមួយប្រទេសរុស្ស៊ី ដែលបានបម្រើផងដែរជាព្រំដែនខាងក្រៅរបស់សហភាពអឺរ៉ុប។

ចាប់តាំងពីថ្ងៃសៅរ៍នេះ អ្នកស្វែងរកសិទ្ធិជ្រកកោនដែលមកដល់តាមរយៈប្រទេសរុស្ស៊ី នឹងត្រូវបានអនុញ្ញាតឱ្យប្រគល់ពាក្យស្នើសុំរបស់ពួកគេតែនៅច្រកឆ្លងកាត់ព្រំដែនភាគខាងជើងចំនួនពីរកន្លែងប៉ុណ្ណោះ គឺនៅ ច្រក Salla និងច្រក Vartius ។