ជនអន្តោប្រវេសន៍រាប់សិបនាក់ ភាគច្រើនមកពីប្រទេសវេណេហ្ស៊ុយអេឡា បានបង្កើតជំរំ នៅក្រោមស្ពាន មួយកន្លែងនៅភាគខាងកើតទីក្រុង Mexico City ខណៈពួកគេរង់ចាំការអនុញ្ញាត ដើម្បីបន្តការធ្វើដំណើរ ទៅកាន់ព្រំដែនសហរដ្ឋអាមេរិក-ម៉ិកស៊ិក។

កាលពីថ្ងៃសុក្រ ជនអន្តោប្រវេសន៍ជាច្រើននាក់បានប្រាប់សារព័ត៌មាន Reuters ថា ពួកគេបានស្វែងរកទីកន្លែងស្នាក់នៅក្នុងជំរំបណ្តោះអាសន្ន មុនពេលបន្តដំណើរទៅកាន់សហរដ្ឋអាមេរិក ដើម្បីសុំសិទ្ធិជ្រកកោន។

នាង Angelica ជាជនអន្តោប្រវេសន៍ជនជាតិវេណេហ្សុយអេឡា ដែលបានមកបោះជំរំរយៈពេល ១៥ ថ្ងៃមកហើយនៅក្រោមស្ពានមួយកន្លែង ដែលតភ្ជាប់ផ្លូវល្បឿនលឿននៅរដ្ឋធានីប្រទេសម៉ិកស៊ិក បាននិយាយថា នាងមិនចង់ឆ្លងកាត់ព្រំដែនដោយខុសច្បាប់នោះទេ ហើយនឹងធ្វើការណាត់ជួបសម្រាប់ការដាក់ពាក្យសុំសិទ្ធិជ្រកកោន តាមរយៈកម្មវិធីរបស់រដ្ឋាភិបាលសហរដ្ឋអាមេរិក គឺ App CBP One ។

ជនអន្តោប្រវេសន៍ ជាធម្មតានឹងត្រូវធ្វើការណាត់ជួបតាមរយៈកម្មវិធី CBP One របស់រដ្ឋាភិបាល និងស្នើសុំសិទ្ធិជ្រកកោន។

ទោះជាយ៉ាងណា ដោយសារតែពុំមានកាលបរិច្ឆេទណាត់ជួប ពួកគេបានងាកទៅការបង្កើតជំរំតង់ ឬរង់ចាំនៅក្នុងប្រទេសម៉ិកស៊ិក សម្រាប់ការណាត់ជួបរបស់ពួកគេ។ ជនអន្តោប្រវេសន៍ ជាច្រើនកំពុងភៀសខ្លួនចេញពីភាពក្រីក្រ និងអស្ថិរភាពនយោបាយនៅក្នុងប្រទេសកំណើតរបស់ពួកគេ។