បេសកជន APEC របស់កោះតៃវ៉ាន់ លោក Morris Chang កាលពីថ្ងៃសុក្រ (ទី១៧ ខែវិច្ឆិកា) បានប្រាប់ថា លោកមានទំនាក់ទំនងក្រៅផ្លូវការជាមួយប្រធានាធិបតីអាមេរិក លោក Joe Biden និងពិភាក្សាជាមួយរដ្ឋមន្ត្រីការបរទេស លោក Antony Blinken ក្នុងកិច្ចប្រជុំកំពូលនៅទីក្រុង San Francisco ប៉ុន្តែមិនមានពាក់ព័ន្ធជាមួយប្រធានាធិបតីចិន លោក Xi Jinping ទេ។

កោះតៃវ៉ាន់ ដែលត្រូវបានទាមទារដោយប្រទេសចិន ដែលចូលរួមក្នុងវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ឬ APEC នេះ ក្នុងនាមជា «ចិនតៃប៉ិ» និងដែលមិនបានបញ្ជូនមេដឹកនាំរបស់ខ្លួនទៅកិច្ចប្រជុំនោះ បានប្រឈមនឹងសម្ពាធយោធាកាន់តែខ្លាំងឡើងពីទីក្រុងប៉េកាំង ក្នុងនោះរួមទាំងសមយុទ្ធធំៗចំនួន២ ក្នុងរយៈ ១ឆ្នាំកន្លះកន្លងទៅនេះ។

លោក Chang វ័យ ៩២ឆ្នាំ ដែលជាស្ថាបនិកក្រុមហ៊ុនយក្សផ្នែកផលិតបន្ទះឈីប TSMC បានប្រាប់អ្នកសារព័ត៌មានថា រូបលោកក៏បានជួបពិភាក្សាជាមួយអនុប្រធានាធិបតីសហរដ្ឋអាមេរិកលោកស្រី Kamala Harris នៅខាងក្រៅព្រឹត្តិការណ៍ដែលរៀបចំដោយសហរដ្ឋអាមេរិកនេះដែរ ដោយនេះជាការមានកិច្ចប្រជុំជាថ្មីម្ដងទៀតរបស់អ្នកទាំង២ បន្ទាប់ពីធ្លាប់ជួបគ្នាកាលពីឆ្នាំមុន នៅប្រទេសថៃ ដែលនៅទីនោះ លោក Chang ក៏បានជួបជាមួយលោក Xi ដែរ។

ពាក់ព័ន្ធនឹងការមិនបានជួបប្រាស្រ័យទាក់ទងជាមួយមេដឹកនាំរបស់ចិន លោក Chang បានប្រាប់ថា លោកមិនមានការផ្លាស់ប្តូរអ្វីជាមួយលោក Xi នោះទេ ក្នុងឆ្នាំនេះ។ ដោយមើលឃើញថា ទាំងកោះតៃវ៉ាន់ និងចិន សុទ្ធតែជាសមាជិកដូចគ្នា ដូច្នេះ APEC គឺជាវេទិកាមួយ ក្នុងចំណោមវេទិកាពិភពលោកមួយចំនួន ដែលមន្ត្រីមកពីភាគីទាំង២ អាចធ្វើអន្តរកម្ម បើទោះបីជាគ្រាន់តែដើម្បីផ្លាស់ប្តូរភាពរីករាយក៏ដោយ៕