មន្ត្រីបានឲ្យដឹងថា ជនប្រដាប់អាវុធម្នាក់បានដើរចូលទៅក្នុងបន្ទប់រង់ចាំនៃមន្ទីរពេទ្យវិកលចរិករបស់រដ្ឋ ក្នុងរដ្ឋ New Hampshire សហរដ្ឋអាមេរិក កាលពីថ្ងៃសុក្រ (ទី១៧ ខែវិច្ឆិកា) ហើយបានបាញ់សម្លាប់អ្នកយាមម្នាក់ មុនពេលមន្ត្រីនគរបាលប្រចាំរដ្ឋ បានបាញ់បណ្ដាលឲ្យជនសង្ស័យស្លាប់ជាក្រោយ។

បើយោងតាមនគរបាលប្រចាំរដ្ឋ លោក Colonel Mark Hall បានឲ្យដឹងថា គ្មានអ្នកណាម្នាក់រងរបួសនោះឡើយ ក្នុងអំពើហិង្សាដោយកាំភ្លើង ដែលបានផ្ទុះឡើងនៅម៉ោងប្រហែល ៣ និង ៣០នាទីរសៀល នៅឯមន្ទីរពេទ្យប្រចាំរដ្ឋ New Hampshire ក្នុងទីក្រុង Concord រដ្ឋធានីរដ្ឋ។

អំឡុងពេលថ្លែងទៅកាន់ក្រុមអ្នកសារព័ត៌មាន ក្នុងសន្និសីទសារព័ត៌មាននាពេលក្រោយ លោក Hall បានបដិសេធមិនផ្តល់ព័ត៌មានណាមួយអំពីជនសង្ស័យនោះទេ។ លោកបន្តថា ក្រុមអ្នកស៊ើបអង្កេតនៅតែព្យាយាមកំណត់អត្តសញ្ញាណជនដៃដល់។

ចំណែកអភិបាលរដ្ឋ New Hampshire លោក Chris Sununu បានសរសេរនៅលើបណ្ដាញសង្គមថា ជនរងគ្រោះមានឈ្មោះ Bradley Haas ដែលធ្វើការផ្នែកសន្តិសុខ នៅមន្ទីរពេទ្យនេះ៕