ឥណ្ឌា ៖ សាច់ញាតិ និងសហកម្មកររបស់កម្មករ៤១នាក់ ដែលជាប់ខ្លួន នៅក្នុងផ្លូវក្រោមដីដែលបាក់រលំក្នុងក្រុងជើងភ្នំ អ៊ូតាកាសស៊ី (Uttarkashi) កាន់តែអសង្ឃឹមកាលពីថ្ងៃសៅរ៍ ខណៈប្រតិបត្ដការជួយសង្រ្គោះ បានចូលដល់ថ្ងៃទី៧របស់ខ្លួន។

ការិយាល័យគ្រប់គ្រងគ្រោះមហន្ដរាយ បានកែប្រែឡើងវិញនូវចំនួនមនុស្សដែលជាប់ខ្លួនតាំងពីព្រឹកថ្ងៃអាទិត្យទី១២វិច្ឆិកា ក្នុងផ្លូវក្រោមដី ក្នុងរដ្ឋឧត្តារៈខាន់ (Uttarakhand) ពី៤០នាក់ឡើងដល់៤១នាក់។ ហើយក្រុមអាជ្ញាធរ បាននិយាយថា ពួកគេមានសុវត្ថិភាពទាំងអស់គ្នា។

កម្មកផ្លូវក្រោមដីជិត១០០នាក់ បានប្រមូលផ្ដុំគ្នានៅឯការដ្ឋានសំណង់ កាលពីថ្ងៃសៅរ៍ ដោយទាមទារឲ្យធ្វើការឲ្យបានឆាប់ជាងមុន ដើម្បីឲ្យចូលដល់គោលដៅ និងរំដោះអ្នកដែលជាប់ខ្លួនត្រឡប់មកវិញ។

កម្មករប្រមាណពី៥០ទៅ៦០នាក់ បានធ្វើការនៅវេនយប់នៅចំពេលដែលមានការបាក់រលំ ហើយអ្នកទាំងនោះ គឺស្ថិតនៅជិតច្រកចេញមកក្រៅផ្លូវក្រោមដី នៅលើផ្លូវជាតិ ដែលជាផ្នែកមួយនៃផ្លូវធម្មយាត្រាហិណ្ឌូ ឆាដាំ។

ក្រុមអាជ្ញាធរ ពុំបាននិយាយនូវអ្វីដែលបណ្ដាលឲ្យមានហេតុការណ៍នេះកើតឡើងនៅផ្លូវក្រោមដីទៅកាន់រូងភ្នំចម្ងាយ៤,៥គីឡូម៉ែត្រនោះទេ ប៉ុន្ដែតំបន់នោះ ងាយនឹងបាក់ដី រញ្ជួយដី និងទឹកជំនន់៕