ជប៉ុន ៖ ទាហានម៉ារីនជប៉ុននៅក្នុងរថក្រោះប្រយុទ្ធដែលអាចធ្វើសកម្មភាពទាំងក្នុងទឹក និងលើគោក បានវាយលុកឆ្នេរកោះមួយនៅមាត់សមុទ្រចិនខាងកើតនៅថ្ងៃអាទិត្យ ១៩ វិច្ឆិកានេះ ក្នុងសមយុទ្ធប្រដូច ទៅនឹងការវាយប្រហារពិតៗ ដើម្បីបណ្តេញអ្នកឈ្លានពានចេញពីទឹកដី ដែលទីក្រុងតូក្យូព្រួយបារម្ភថាងាយរងការវាយប្រហារពីប្រទេសចិន។

រថក្រោះប្រយុទ្ធស្វ័យការពារដែលអាចធ្វើសកម្មភាពទាំងក្នុងទឹក និងលើគោក បានចាប់ផ្តើមចេញពីនាវាទាហានម៉ារីនពីរគ្រឿង កំពុងចតរបស់កងកម្លាំងការពារស្វ័យការពារដែនសមុទ្រ ដែលបានបោះយុថ្កានៅឆ្នេរសមុទ្រ ដោយចតនៅលើកោះ តូគូសូស៊ីម៉ា (Tokunoshima) ភាគនិរតី។  

លោក ឧត្តមសេនីយ យ៉ូស៊ីហ៊ីដេ យ៉ូស៊ីដា (Yoshihide Yoshida) នាយសេនាធិការចម្រុះនៃកងកម្លាំងការពារស្វ័យការពាររបស់ប្រទេសជប៉ុន បាននិយាយ បន្ទាប់ពីពិនិត្យមើលដំណើរការសមយុទ្ធនេះថា គោលដៅគឺដើម្បីបង្ហាញថា ប្រសិនបើមានស្ថានភាពគ្រាអាសន្នណាមួយ ដែលកើតចេញពីការវាយប្រហារប្រឆាំងនឹងប្រទេសរបស់លោក ប្រទេសនេះ អាចទប់ទល់ និងកែលម្អប្រតិបត្តិការរួមគ្នាក្រោមសេណារីយ៉ូនោះ ។ 

វិសាលភាព និងល្បឿននៃសមយុទ្ធយោធានៅក្នុងប្រទេសជប៉ុនទំនងជាកើនឡើងក្នុងរយៈពេលប៉ុន្មានឆ្នាំខាងមុខ រួមទាំងកងកម្លាំងសហរដ្ឋអាមេរិក បន្ទាប់ពីលោកនាយករដ្ឋមន្ត្រីហ្វូមីអូ គីស៊ីដា (Fumio Kishida)កាលពីខែធ្នូ បានបង្ហាញពីការបង្កើនសមត្ថភាពយោធាដ៏ធំបំផុតរបស់ប្រទេសនេះ ចាប់តាំងពីសង្គ្រាមលោកលើកទី ២ ដោយសន្យាថានឹងបង្កើនការចំណាយលើវិស័យការពារជាតិទ្វេដងក្នុងរយៈពេលជាង៥ឆ្នាំ៕