ប៉ាឡេស្ទីន ៖ ប្រធានាធិបតីប៉ាឡេស្ទីន លោកម៉ាស់មុត អាបាស់ កាលពីថ្ងៃសៅរ៍ បានធ្វើការអំពាវនាវទៅកាន់ប្រធានាធិបតីអាមេរិក លោកចូ បៃឌិន អោយជួយអន្ដរាគមន៍បញ្ឈប់ប្រតិបត្ដិការរបស់អ៊ីស្រាអែល។

ប្រធានាធិបតីអាមេរិក លោក ចូ បៃឌិន បាននិយាយ កាលពីថ្ងៃសៅរ៍ថា អាជ្ញាធប៉ាឡេស្ទីននៅទីបំផុតចុងក្រោយគួរតែ គ្រប់គ្រងតំបន់ ហ្កាហ្សាស្រ្ទីប (Gaza Strip) និងតំបន់ វេស បែង (West Bank) បន្ទាប់ពីសង្រ្គាមអ៊ីស្រាអែល-ហាម៉ាស។

អាជ្ញាធប៉ាឡេស្ទីន ធ្លាប់គ្រប់គ្រងទាំងតំបន់វេស បែង ទាំងតំបន់ហ្កាហ្សាស្រ្ទីប ប៉ុន្ដែក្រោយមក ត្រូវបានបណ្ដេញចេញក្នុងឆ្នាំ២០០៧ បន្ទាប់ពីសង្រ្គាមស៊ីវិលជាមួយក្រុមហាម៉ាសរយៈពេលខ្លីមក។

អ៊ីស្រាអែល បានប្ដេជ្ញាសងសឹកក្រុមហាម៉ាសដែលគ្រប់គ្រងតំបន់ហ៊ុមព័ទ្ធជិតមាត់សមុទ្រ បន្ទាប់ពីក្រុមសកម្មប្រយុទ្ធ បានវាយប្រហារទាំងកម្រោលចូលកាលពីថ្ងៃទី៧តុលាចូលក្នុងប្រទេសអ៊ីស្រាអែលដោយ ក្រុមសកម្មប្រយុទ្ធរបស់ខ្លួន បានសម្លាប់មនុស្សអស់១.២០០នាក់ និងបានចាប់មនុស្ស២៤០នាក់ ធ្វើជាចំណាប់ថ្នូរ។

តាំងពីពេលនោះមក អ៊ីស្រាអែល បានទម្លាក់គ្រាប់បែកដោយបានធ្វើឲ្យទីក្រុងហ្កាហ្សាភាគច្រើន ក្លាយជាកម្ទេចថ្មដែលជាបេះដូងរបស់ក្រុងតំបន់ហ៊ុមព័ទ្ធ និងបានបញ្ជាជនស៊ីវិលនៅភាគខាងជើងចាកចេញ ហើយមនុស្សប្រមាណជាពីរភាគបីនៃប្រជាជនតំបន់ហ្កាហ្សាប្រមាណ២លាន៣សែននាក់ បានបាត់បង់ទីជម្រក។

ក្រុមអាជ្ញាធតំបន់ហ្កាហ្សា កាលពីថ្ងៃសៅរ៍ បានលើកឡើងពីចំនួនអ្នកស្លាប់សរុបតាំងពីថ្ងៃទី៧តុលាមក ឡើងដល់១២.៣០០នាក់ ក្នុងនោះមានកុមារ៥.០០០នាក់ ផងដែរ៕