ហ្កាហ្សា ៖ សារព័ត៌មាន Washington Post បានរាយការណ៍ ដោយសំអាងដល់ប្រភពពីមនុស្សមួយចំនួនដែលបានដឹងកិច្ចព្រមព្រៀងនេះថា អ៊ីស្រាអែល សហរដ្ឋអាមេរិក និងក្រុមហាម៉ាស បានឈានដល់កិច្ចព្រមព្រៀងបណ្តោះអាសន្នមួយ ដើម្បីដោះលែងស្ត្រី និងកុមាររាប់សិបនាក់ ដែលត្រូវបានចាប់ជាចំណាប់ថ្នូរនៅតំបន់ហ្កាហ្សា ជាថ្នូរនឹងការផ្អាកប្រយុទ្ធរយៈពេល៥ថ្ងៃ។  

ទោះបីជាយ៉ាងណាក៏ដោយ ទាំងនាយករដ្ឋមន្ត្រីអ៊ីស្រាអែល លោក Benjamin Netanyahu និងមន្ត្រីសហរដ្ឋអាមេរិក បាននិយាយថា មិនទាន់មានកិច្ចព្រមព្រៀងណាមួយត្រូវបានសម្រេចនៅឡើយទេ។

សារព័ត៌មាននេះ បាននិយាយកាលពីថ្ងៃសៅរ៍ថា ការដោះលែងចំណាប់ខ្មាំងអាចចាប់ផ្តើមក្នុងរយៈពេលប៉ុន្មានថ្ងៃខាងមុខ ដោយរារាំងការប៉ះទង្គិចនៅនាទីចុងក្រោយ នេះបើយោងតាមមនុស្សដែលដឹងកិច្ចព្រមព្រៀងលម្អិត មានកម្រាស់៦ទំព័រ។  

របាយការណ៍នេះកើតឡើងស្របពេលដែលអ៊ីស្រាអែល ទំនងជាកំពុងត្រៀមពង្រីកការវាយលុករបស់ខ្លួនលើក្រុមសកម្មប្រយុទ្ធហាម៉ាស ទៅកាន់ភាគខាងត្បូងតំបន់ហ្កាហ្សា បន្ទាប់ពីការវាយប្រហារតាមអាកាសបានសម្លាប់ប្រជាជនប៉ាឡេស្ទីនរាប់សិបនាក់ រួមទាំងជនស៊ីវិលដែលត្រូវបានរាយការណ៍ថាកំពុងជ្រកនៅក្នុងសាលារៀនចំនួនពីរ។

សារព័ត៌មានខាងលើបានរាយការណ៍ថា ស្ថិតក្រោមកិច្ចព្រមព្រៀងនោះ ភាគីទាំងអស់នឹងផ្អាកប្រតិបត្តិការប្រយុទ្ធយ៉ាងហោចណាស់៥ថ្ងៃ ខណៈចំណាប់ថ្នូរចំនួន៥០ នាក់ឬច្រើនជាងនេះត្រូវដោះលែងជាក្រុមរៀងរាល់ ២៤ ម៉ោងម្តង។

ប៉ុន្តែលោក Netanyahu បានប្រាប់សន្និសីទសារព័ត៌មានមួយកាលពីល្ងាចថ្ងៃសៅរ៍ថា ទាក់ទងនឹងចំណាប់ខ្មាំង មានពាក្យចចាមអារ៉ាមមិនច្បាស់លាស់ក៏ដូជជារបាយការណ៍មិនត្រឹមត្រូវជាច្រើន។ លោកចង់បញ្ជាក់ឱ្យច្បាស់ថា មកទល់ពេលនេះ មិនទាន់មានកិច្ចព្រមព្រៀងនៅឡើយទេ។ ប៉ុន្តែលោកចង់សន្យាថា នៅពេលមានអ្វីដែលត្រូវនិយាយ យើងនឹងរាយការណ៍ទៅអ្នកទាំងអស់គ្នាភ្លាម៕