ក្រុមអាជ្ញាធរសាធារណៈរដ្ឋដូមីកង់ កាលពីថ្ងៃអាទិត្យបាននិយាយថា មនុស្សយ៉ាង​ហោច​ណាស់​ ២១នាក់ បានស្លាប់បន្ទាប់ពីមានភ្លៀងធ្លាក់ខ្លាំង មួយថ្ងៃមុន ដែលបាន​ធ្វើឱ្យ​ប្រជាពលរដ្ឋ​រាប់ពាន់​នាក់​ជម្លៀសចេញទីលំនៅឋាន។  

មជ្ឈមណ្ឌលប្រតិបត្តិការសង្គ្រោះបន្ទាន់ (COE) បាននិយាយ​នៅ​ក្នុង​របាយការណ៍​មួយ​កាល​ពី​រសៀល​ថ្ងៃ​អាទិត្យថា មនុស្សជាង១៣.០០០នាក់នៅក្នុងប្រទេសតំបន់ការ៉ាអ៊ីប មួយនេះ ត្រូវ​ជម្លៀស​ទៅ​កាន់តំបន់មានសុវត្ថិភាពបន្ថែមទៀត បន្ទាប់ពីភ្លៀងធ្លាក់ខ្លាំងបានជន់លិចផ្ទះសម្បែង បណ្តាល​ឱ្យដាច់ចរន្តអគ្គិសនី បំផ្លិចបំផ្លាញស្ពាន និងផ្នែកខ្លះនៃផ្លូវថ្នល់។

នគរបាលជាតិ បាននិយាយថា ជនរងគ្រោះដោយសារព្យុះនេះ រួមមានមនុស្ស ៩នាក់ ដែល​បាន​ស្លាប់​កាល​ពីថ្ងៃសៅរ៍ បន្ទាប់ពីមានភ្លៀងធ្លាក់ បណ្តាលឲ្យជញ្ជាំងផ្លូវរូងក្រោមដី បាក់សង្កត់​លើ​រថយន្ត​របស់ពួកគេ។ 

មជ្ឈមណ្ឌលប្រតិបត្តិការសង្គ្រោះបន្ទាន់ ខាងលើបាននិយាយថា មនុស្សជាង២.៥០០នាក់ ត្រូវ​បាន​ជួយសង្គ្រោះដោយភ្នាក់ងារការពារ ហើយលំនៅឋានជាង ២.៦០០ខ្នង ត្រូវបាន​រង​ផល​ប៉ះពាល់​ដោយព្យុះនេះ ។

យោងតាមរបាយការណ៍របស់ មជ្ឈមណ្ឌលប្រតិបត្តិការសង្គ្រោះបន្ទាន់ សហគមន៍ចំនួន ៤៥ បាន​គ្មានទំនាក់ទំនងទេ គិតត្រឹមរសៀលថ្ងៃអាទិត្យ។

ភ្លៀង​ធ្លាក់​ខ្លាំង ផ្គររន្ទះ និងខ្យល់កន្រ្តាក់បានវាយប្រហារខេត្តមួយចំនួននៃកោះ ស្ថិតក្នុងតំបន់​សមុទ្រ​ការ៉ាអ៊ីប ក្នុងរយៈពេល ២៤ ម៉ោងចុងក្រោយនេះ។  

ក្រុមអាជ្ញាធរ​បានប្រកាស​គ្រាអាសន្ន​ក្នុង​ខេ​ត្ត​ចំនួន​៣០​ក្នុង​ចំណោម​ខេត្ត​ទាំង​៣២​របស់​ប្រទេស​នេះ៕