ការិយាល័យប្រព័ន្ធផ្សព្វផ្សាយរដ្ឋាភិបាលនៅតំបន់ហ្កាហ្សា បានប្រកាសកាលពីថ្ងៃអាទិត្យថា ចំនួនអ្នកស្លាប់របស់ប៉ាឡេស្ទីន នៅតំបន់ហ្កាហ្សាស្ទ្រីប បានកើនឡើងលើស ១៣.000 នាក់ ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី៧ ខែតុលា។

លោក Ismail al-Thawabta អគ្គនាយកនៃការិយាល័យប្រព័ន្ធផ្សព្វផ្សាយ បាននិយាយនៅក្នុងសន្និសីទសារព័ត៌មានថា ក្នុងចំណោមអ្នកស្លាប់មានកុមារចំនួន ៥.៥០០នាក់ និងស្ត្រីចំនួន ៣.៥០០នាក់ ខណៈដែលមនុស្សជាង ៣០.000 នាក់ផ្សេងទៀត បានរងរបួសផ្សេងៗគ្នា។

លោក Al-Thawabta បាននិយាយថា ចំនួនអ្នកបាត់ខ្លួន បានកើនលើស ៦.០០០នាក់ ក្នុងនោះមានកុមារ និងស្ត្រីចំនួន ៤.000 នាក់ នៅតែស្ថិតនៅក្រោមគំនរបាក់បែកនៃអគារ ដែលត្រូវបានបំផ្លាញដោយការវាយប្រហាររបស់អ៊ីស្រាអែល។

អ៊ីស្រាអែល បាននិងកំពុងធ្វើការវាយប្រហារលើតំបន់ហ្កាហ្សាក្នុងរយៈពេលប៉ុន្មានសប្តាហ៍កន្លងមកនេះ ដើម្បីសងសឹកនឹងការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាសលើអ៊ីស្រាអែលភាគខាងត្បូង កាលពីថ្ងៃទី៧ ខែតុលា ក្នុងអំឡុងពេលដែលក្រុមសកម្មប្រយុទ្ធហាម៉ាស បានសម្លាប់មនុស្សប្រហែល១.២០០ នាក់ និងចាប់ចំណាប់ថ្នូរជាង ២០០នាក់។