ប្រធានាធិបតីហ្វីលីពីនបាននិយាយនៅថ្ងៃច័ន្ទ (២០ វិច្ឆិកា) នេះថា ប្រទេសហ្វីលីពីន បានងាកទៅរកប្រទេសជិតខាងដូចជាម៉ាឡេស៊ី និងវៀតណាម ដើម្បីពិភាក្សាអំពីក្រមប្រតិបត្តិដាច់ដោយឡែកមួយទាក់ទងនឹងសមុទ្រចិនខាងត្បូង ដោយលើកឡើងពីការវិវត្តន៍មានកម្រិតឆ្ពោះទៅរកកិច្ចព្រមព្រៀងតំបន់ទូលំទូលាយជាមួយចិន។

ទំនាក់ទំនងរវាងហ្វីលីពីន និងចិន កាន់តែតានតឹងឡើងក្រោមការដឹកនាំរបស់លោកប្រធានាធិបតី Ferdinand Marcos Jr ដែលបានត្អូញត្អែរកាន់តែខ្លាំងឡើងអំពីអាកប្បកិរិយា «ឈ្លានពាន» របស់ប្រទេសចិន ខណៈកំពុងធ្វើឱ្យទំនាក់ទំនងរឹងមាំឡើងវិញជាមួយសម្ព័ន្ធមិត្តសន្ធិសញ្ញាតែមួយគត់របស់ប្រទេសហ្វីលីពីន គឺសហរដ្ឋអាមេរិក។

ថ្លែងនៅក្នុងរដ្ឋហាវ៉ៃ របស់សហរដ្ឋអាមេរិក ក្នុងព្រឹត្តិការណ៍ផ្សាយផ្ទាល់មួយ លោកប្រធានាធិបតី Marcos បាននិយាយថា កំណើនភាពតានតឹងនៅសមុទ្រចិនខាងត្បូងតម្រូវឱ្យហ្វីលីពីនធ្វើជាដៃគូជាមួយសម្ព័ន្ធមិត្ត និងអ្នកជិតខាង ដើម្បីរក្សាសន្តិភាពនៅក្នុងផ្លូវទឹកដ៏មមាញឹក ដោយស្ថានភាពពេលនេះ «កាន់តែអាក្រក់»។

ស្ថានទូតចិន ម៉ាឡេស៊ី និងវៀតណាម នៅទីក្រុងម៉ានីល មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើលទ្ធភាពនៃក្រមប្រតិបត្តិនេះនោះទេ។

ការលើកឡើងរបស់លោក Marcos បានធ្វើឡើងបន្ទាប់ពីកិច្ចប្រជុំរបស់លោកកាលពីថ្ងៃសុក្រ ជាមួយប្រធានាធិបតីចិន លោក ស៊ី ជីនពីង (Xi Jinping) នៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នៅទីក្រុងសាន់ហ្រ្វាន់ស៊ីស្កូ។ មេដឹកនាំទាំងពីររូបបានពិភាក្សាអំពីវិធីកាត់បន្ថយភាពតានតឹងនៅក្នុងដែនទឹកយុទ្ធសាស្ត្រដែលមានជម្លោះ បន្ទាប់ពីមានការប្រឈមមុខគ្នាជាបន្តបន្ទាប់ក្នុងឆ្នាំនេះ៕