​បាល់ទាត់៖ ​សារព័ត៌មាន​កីឡា​នៅ​ចក្រភព​អង់គ្លេស​មួយ​បាន​ចុះផ្សាយ​ថា Manchester United បាន​ឈានដល់​កិច្ចព្រមព្រៀង​ក្នុង​ការនាំយក​ខ្សែបម្រើ​ស្លាប​អង់គ្លេស Jadon Sancho ពី Borussia Dortmund តែ​នៅពេលនេះ​មាន​ព័ត៌មាន​ពី​អាល្លឺម៉ង់​ថា Dortmund បាន​ច្រានចោល​សំណើ ៦៧លាន​ផោន​របស់ Manchester United ហើយ​។

​​ក្លិប​អាល្លឺម៉ង់​មួយ​នេះ​បានទាមទារ ៧៧លាន​ផោន​សំរាប់​ការផ្ទេរ​កីឡាករ​វ័យ ២១ឆ្នាំ​រូបនេះ បូក​នឹង​ប្រាក់​បន្ថែម​ផ្សេងៗ​ជាង ៤លាន​ផោន​ផ្សេងទៀត​។ ​Manchester United នៅពេលនេះ​កំពុង​ពិចារណា​ក្នុង​ការបន្ត​ការ​តថ្លៃ​ជាមួយ Dortmund​។ ​ក្លិប​នៅ Old Trafford មួយ​នេះ​ទំនង​ជា​មិន​ចង់​ជាន់​ដាន​ចាស់​កាលពី ១២ខែ​មុន​ឡើយ ​ដែល​ពួកគេ​បរាជ័យ​ក្នុងការ​នាំយក Sancho ត្រលប់មក​អង់គ្លេស​វិញ ហើយ​ក្លិប​អាល្លឺម៉ង់ Dortmund ក៏ត្រូវ​បាន​គេ​ជឿថា​នឹង​ថយ​មួយ​ជំហាន​ដែរ ​ក្នុងការបញ្ចេញ Jadon Sancho ក្នុង​តំលៃ​សមរម្យ​ណាមួយ​។​

​​Jadon Sancho គឺ​កីឡាករ​ម្នាក់​គត់​ដែល​បានទទួល​សំណើ​ទិញ​ពី​ក្លិប​ផ្សេង ស្រប​ពេលដែល​ខ្សែប្រយុទ្ធ​ណ័​រវេ​យ Erling Haaland ដែលមាន​ពាក្យ​ចចាមអារ៉ាម​ចង់បាន​ពី​ក្លិប​ធំៗ​នៅ​អឺរ៉ុប​នោះ Dortmund មិនទាន់​បានទទួល​សំណើ​ណាមួយ​នៅឡើយ​។ ​កីឡាករ​វ័យក្មេង​អង់គ្លេស​មួយរូប​ទៀត Jude Bellingham ក៏​ស្ថិតក្នុង​គោលដៅ​អាច​ផ្ទេរ​ចេញពី​ទឹកដី​អាល្លឺម៉ង់​ផងដែរ​៕

​អត្ថបទ​៖​នាង សុភា​វុ​ធ