មនុស្សជាច្រើន នៅទីក្រុងប៉ារីស ដែលរួមមានទាំងតារាសម្ដែងលោកស្រី Isabelle Adjani និងលោកស្រី Emmanuelle Beart ក៏ដូចជាតារាចម្រៀង និងឥស្សរជនវប្បធម៌ផ្សេងទៀត បានដើរដង្ហែចេញពីវិទ្យាស្ថានពិភពលោកអារ៉ាប់ឆ្ពោះទៅកាន់សារមន្ទីរសិល្បៈ និងប្រវត្តិសាស្ត្រសាសនានៃជនជាតិជីហ្វ ដែលមានទីតាំងនៅកាត់ទន្លេ Seine (សែន) ដែលការធ្វើបែបនេះ គឺក្នុងគោលបំណងទាមទារឲ្យមានការបញ្ចប់សង្គ្រាមនៅក្នុងជម្លោះអ៊ីស្រាអែល-ប៉ាឡេស្ទីន។

ប្រទេសបារាំង ដែលជាកន្លែងរស់នៅដ៏ធំរបស់ប្រជាជនជ្វីហ្វ និងមូស្លីម បានកើតមានការតវ៉ាជាច្រើនសប្តាហ៍ និងភាពតានតឹង ជុំវិញសង្រ្គាមអ៊ីស្រាអែល និងក្រុមហាម៉ាស។ រដ្ឋាភិបាលបារាំងកំពុងជំរុញឲ្យមានបទឈប់បាញ់មួយ ដើម្បីឲ្យជំនួយមនុស្សធម៌បានទៅដល់ជនស៊ីវិលប៉ាឡេស្ទីន នៅតំបន់ហ្កាហ្សា ហើយក៏កំពុងព្យាយាមចរចាដោះលែងចំណាប់ថ្នូរបារាំង ៨នាក់ ដែលក្រុមហាម៉ាសឃុំខ្លួន។ គួរបញ្ជាក់ដែរថា ពលរដ្ឋបារាំង ៤០នាក់ផ្សេងទៀត ត្រូវបានសម្លាប់ក្នុងការវាយប្រហាររបស់ក្រុមហាម៉ាស នៅភាគខាងត្បូងអ៊ីស្រាអែល កាលពីថ្ងៃទី៧ ខែតុលា។

ប្រធានាធិបតីបារាំង លោក Emmanuel Macron កាលពីថ្ងៃអាទិត្យ (ទី១៩ ខែវិច្ឆិកា) បាននិយាយជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu និងមេដឹកនាំប៉ាឡេស្ទីន លោក Mahmoud Abbas ហើយបានពិភាក្សាជាមួយមេដឹកនាំនៃប្រទេសកាតា និងអេហ្ស៊ីប កាលពីថ្ងៃសៅរ៍ ដែលជាផ្នែកនៃកិច្ចខិតខំប្រឹងប្រែងការទូតរបស់លោក។ លោក Macron បានបញ្ជាក់ពីការគាំទ្ររបស់លោក ដែលអ៊ីស្រាអែលប្រើសិទ្ធិការការពារខ្លួន ប៉ុន្តែបានបរិហារថា មាន «ការបាត់បង់ជនស៊ីវិលច្រើនពេក» នៅក្នុងតំបន់ហ្កាហ្សា៕