​បាល់ទាត់៖ ក្រុមបាល់ទាត់​ជំរើសជាតិ​ស៊ុយអែត​ បាន​ហ្វឹកហាត់​ជុំគ្នាត្រៀម​ជួប​ជាមួយ​ក្រុម​អេ​ស្ប៉ា​ញ​នៅ​ទីក្រុង Seville ក្នុង​ពូ​ល E នៅ Euro ២០២០ ខណៈ​ក្រុម​ទាំងពីរ​សុទ្ធ​តែមាន​កីឡាករ​ឆ្លង Covid-19 ពីរ​នាក់​ដូចគ្នា​។

​​ក្រុម​ស៊ុយអែត​បានប្រកាស​កាលពី​ថ្ងៃ​អង្គា​រថា ​កីឡាករ​ពីរ​នាក់​របស់​ខ្លួន​ត្រូវបាន​ធ្វើតេស្ត​ឃើញ​វិជ្ជមាន Covid-19 រួមមាន​កីឡាករ​របស់ Juventus, Dejan Kulusevski និង​កីឡាករ​របស់ Bologna, Mattias Svanberg​។ ​​ចំណែក​អេ​ស្ប៉ា​ញ​ក៏មាន​កីឡាករ​ពីរ​នាក់​ឆ្លង Covid-19 ដែរ​ដំបូង​គឺប្រធាន​ក្រុម Sergio Busquet និង Diego Llorente​។ ​​សំរាប់ Llorente បានធ្វើ​តេស្ត​ម្សិលមិញ​ឃើញ​ត្រលប់មក​អវិជ្ជមាន​វិញ​ហើយ តែរង់ចាំ​ការធ្វើ​តេស្ត​ម្តងទៀត​នៅ​ថ្ងៃសុក្រ​នេះ ​ប្រសិនជា​បន្ត​អវិជ្ជមានកីឡាករ​របស់ Leeds United រូបនេះ​នឹង​ត្រលប់មក​ចូលរួម​ជាមួយ​ក្រុម​ជំរើសជាតិ​វិញ​បាន​។

​​កីឡាករ​ដែល​បានធ្វើ​តេស្ត​ឃើញ​មាន Covid-19 នឹងត្រូវ​នៅ​ដាច់ដោយឡែក​យ៉ាងហោចណាស់ ១០ថ្ងៃ​មានន័យថា​ កីឡាករ​ទាំងពីរ Sergio Busquet និង Diego Llorente ក៏ដូចជា​កីឡាករ​ទាំងពីរ​នាក់រ​បស់​ស៊ុយអែត Dejan Kulusevski និង Mattias Svanberg នឹង​អវត្តមាន​ការប្រកួត​ដំបូង​ក្នុង​ពូ​ល E ដែល​អេ​ស្ប៉ា​ញ​ជួប​ជាមួយ​ស៊ុយអែត​៕

​អត្ថបទ​៖​នាង សុភា​វុ​ធ