សមាជិកក្រុមគ្រួសារចំនួនរបស់ចំណាប់ថ្នូរអ៊ីស្រាអែល ដែលត្រូវបាន​ក្រុម​ហាម៉ាស​ចាប់​ពង្រត់​យក​ទៅបាននិយាយថា ពួកគេខកចិត្តកាន់តែខ្លាំង ក្រោយ​ជំនួប​ជាមួយ​គណៈ​រដ្ឋ​មន្ត្រី​សង្រ្គាម​របស់​អ៊ីស្រាអែល​កាល​ពីល្ងាចថ្ងៃអង្គារ។

ខណៈសង្រ្គាមរបស់អ៊ីស្រាអែលនៅតំបន់ហ្កាហ្សារាលដាលកាន់តែខ្លាំង សាច់ញាតិ​របស់​ចំណាប់​ខ្មាំង​ជាង ២៤០ នាក់ បាន​និង​កំពុង​តស៊ូ​មតិ​ជំនួស​រដ្ឋាភិបាល​អ៊ីស្រាអែល​ដើម្បី​ទទួល​បាន​មនុស្ស​ជាទីស្រលាញ់​របស់ពួកគេមកវិញឱ្យបានឆាប់តាមដែលអាចធ្វើទៅបាន។

ថ្មីៗនេះ សមាជិកគ្រួសាររាប់ពាន់នាក់បានបញ្ចប់ការដើរក្បួនរយៈពេល៥ថ្ងៃពីទីក្រុង Tel Aviv ទៅ​កាន់​គេហដ្ឋានរបស់លោកនាយករដ្ឋមន្ត្រី Benjamin Netanyahu ក្នុងទីក្រុង Jerusalem ជា​កន្លែង​ដែល​លោកបានសន្យាចុងក្រោយ ថាពួកគេ​អាច​ជួប​ជាមួយ​សមាជិក នៃ​គណៈ​រដ្ឋ​មន្ត្រី​សង្គ្រាម​របស់អ៊ីស្រាអែលក្នុងសប្តាហ៍នេះ។

បន្ទាប់​ពីកិច្ចប្រជុំរវាងគណៈរដ្ឋមន្ត្រីសង្គ្រាម និងសមាជិកគ្រួសារមួយចំនួនតូចកាលពីល្ងាចថ្ងៃចន្ទ អ្នក​ចូល​រួមម្នាក់ឈ្មោះអ៊ូឌីហ្គ័រេន(Udi Goren)ដែលបងប្អូនជីដូនមួយរបស់លោកឈ្មោះ Tel Haimi បច្ចុប្បន្នកំពុងត្រូវបានជាប់ឃុំក្នុងដៃក្រុមហាម៉ាសនៅហ្កាហ្សា បាននិយាយថា លោក​សង្ឃឹម​ថា​ រដ្ឋាភិបាលអ៊ីស្រាអែលនឹងផ្តល់អាទិភាពដល់ការវិលត្រឡប់របស់ចំណាប់ខ្មាំង ជា​ចម្បង និង​សំខាន់បំផុត។

យោង​តាម​ទិន្នន័យពីអ៊ីស្រាអែល ចំណាប់ខ្មាំងប្រហែល ២៤០ នាក់ត្រូវបានក្រុមហាម៉ាសចាប់ខ្លួន អំឡុង​ការ​វាយឆ្មក់ឆ្លងព្រំដែនដ៏សាហាវ ចូលទៅក្នុងប្រទេសអ៊ីស្រាអែល កាលពីថ្ងៃទី ៧ ខែតុលា​ដែល​ជំរុញឱ្យអ៊ីស្រាអែលឈ្លានពានទឹកដីប៉ាឡេស្ទីន បំណងកម្ទេច​ក្រុមហាម៉ាស​។​ មនុស្ស​ប្រហែល​ ១.២០០នាក់ ភាគច្រើនជាជនស៊ីវិល ត្រូវបាន​សម្លាប់​នៅ​ក្នុង​ការ​វាយ​លុក​របស់​ក្រុម​ហាម៉ាស ដែលជាថ្ងៃដ៏អាក្រក់បំផុតក្នុងប្រវត្តិសាស្ត្ររយៈ៧៥ ឆ្នាំរបស់អ៊ីស្រាអែល៕