ប្រមុខអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទថា ពិភព​លោក​បាន​ឃើញ​ចំនួនអ្នកស្លាប់ ដែលមិនអាចប្រៀបធៀបបាន និងមិនធ្លាប់មាន នៅ​ក្នុង​តំបន់​ហ្កាហ្សា ក្នុងរយៈពេលត្រឹមតែជាង ៦សប្តាហ៍នៃសង្គ្រាមរវាងក្រុមហាម៉ាស និងអ៊ីស្រាអែល ដែល​បាន​ផ្ដាច់​ជីវិតកុមាររាប់ពាន់នាក់។

អង្គការសហប្រជាជាតិ បាននិយាយថា នៅពេលបច្ចុប្បន្ននេះ ភាគច្រើន​ នៃ​ប្រជាជន​ហ្កាហ្សា​ចំនួន ២លាន៣សែននាក់ គ្មានផ្ទះសម្បែង។

ឆ្លើយ​តបទៅនឹងសំណួរនៅក្នុងសន្និសីទសារព័ត៌មាន លោកអគ្គលេខាធិការអង្គការសហប្រជាជាតិ Guterres បានសង្កត់ធ្ងន់ថា ក្នុងអំឡុងពេលកាន់តំណែងរបស់លោក របាយការណ៍​ស្តីពី​កុមារ​រង​គ្រោះ​ក្នុង​ជម្លោះ បានបង្ហាញពីការពិតដ៏សោកសៅដែល "កុមាររាប់ពាន់នាក់" ត្រូវ​បាន​សម្លាប់​នៅ​ក្នុ​ង​តំបន់ហ្កាហ្សាក្នុងរយៈពេលពីរបីសប្តាហ៍ កន្លងមកនេះ។ 

ក្រុម​អាជ្ញាធរសុខាភិបាលតំបន់ហ្កាហ្សាបាននិយាយថា ជនស៊ីវិលជាង១៣.០០០ នាក់​ត្រូវ​បាន​សម្លាប់​នៅ​ក្នុង​តំបន់​ឡោមព័ទ្ធប៉ាឡេស្ទីន ចាប់តាំងពីកងទ័ពអ៊ីស្រាអែល​បាន​បើក​ប្រតិបត្តិការ​យោធា​ដ៏ធំ​លើហ្កាហ្សាកាលពីថ្ងៃទី ៧ ខែតុលា បន្ទាប់ពីពួកសកម្មប្រយុទ្ធអ៊ីស្លាមហាម៉ាស បាន​វាយ​ប្រហារ​អ៊ីស្រាអែលដោយបានសម្លាប់មនុស្ស ១.២០០នាក់ ។

លោក Guterres បាននិយាយ តើនេះជាអ្វី? យើងកំពុងមើលឃើញការសម្លាប់ជនស៊ីវិល ដែល​គ្មាន​អ្វី​ប្រៀបផ្ទឹមបាន និងមិនធ្លាប់មាននៅក្នុងជម្លោះណាមួយ ចាប់តាំង​ពី​លោក​កាន់​តំណែង​ជា​អគ្គ​លេខាធិការមកអង្គការសហប្រជាជាតិជាច្រើនឆ្នាំមកនេះ។

ជាមួយគ្នានេះ សាររបស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន កាល​ពី​ថ្ងៃចន្ទ បានហៅស្ថានភាពនៅក្នុងជម្រកនានាថា "មិនអាចរស់បាន" ដោយ​សង្កត់​ធ្ងន់​លើ​កង្វះ​ជម្រើស​សម្រាប់ ពលរដ្ឋហ្កាហ្សា និងគ្មានកន្លែងសុវត្ថិភាពសម្រាប់ជនស៊ីវិល៕